In Jesus het 'n nuwe dag aangebreek
Eugene du Randt
Deel 2
Dag 1: Versoen met God
Dit voel vir my asof ons gedurig aan die stoei is met onsself. Elkeen van ons sukkel met dinge om te oorkom. Dit is gewoonlik dieselfde tipe dinge wat ons pooitjie en wat ons sukkel om te oorwin. Soms is dit daardie een persoon wat daarin slaag om jou vrede te steel. Dit kan ook 'n slegte gewoonte wees wat jy sukkel om af te skud. Miskien is dit jou humeur of slegte eetgewoontes. Dit kan ook goed soos 'n minderwaardigheidsgevoel, vrees, verwerping of moedeloosheid wees.
Almal van ons het al gevoel asof ons dit nie gaan maak nie. Ons voel maklik soos 'n mislukking wanneer ons in die vlees probeer om op ons eie hierdie dinge te oorkom. Soms voel 'n mens asof jy sommer wil tou opgooi, want jy kom dan nie reg nie. Solank as wat ons sukkel om die waarheid van 2 Kor. 5:17-19 ons eie te maak, sal ons wees soos 'n hond wat sy eie stert jaag. Ons sal aanhoudend in 'n sirkel beweeg.
Die Woord sê dat ons in Christus 'n nuwe mens is. Dit is sulke goeie nuus. Ons is nie alleen nie. Jesus is by ons en met die Heilige Gees kry ons nuwe krag en leiding op die pad van heiligmaking. Ons is nuwe mense.
God het ons met Hom versoen deur die kruiswerk van Jesus Christus en sy opstanding. Ons kan strewe na perfeksie in die vlees, maar ons het 'n sondige natuur wat dit vir ons onmoontlik maak om te oorwin en vry te raak. Ons kan dit nie doen nie. God is so lief vir ons en is so genadig dat Hy vir ons vryheid bewerk het van ons eie sonde en menswees en nuwe skepsels van ons gemaak het. Ons is sy eie kinders.
Ons moet nou hierdie waarheid ons eie maak en die vlees aan die gees onderwerp. Ons moet die leuen van die vyand oorwin deur dit te bely en die waarheid van ons verhouding van versoening met God in die plek van die leuen te stel. Die Woord is die waarheid en dit maak ons vry.
Versoening met God beteken dat ek in die regte verhouding met God staan en dat Hy my sien as 'n geregtige, regverdige en sondelose kind. Hy kyk na my deur die bloed van Jesus Christus en Hy sien my anderkant die kruiswerk. Ons probleem is dat ons so maklik na die stem van die vyand luister, want ons kan nie ons kop verby die gedagte kry dat God, wat alles weet en alles sien, so iets kon doen nie. Dit is asof Hy 'n blinde oog gooi. Ons verstaan nie hoe die geestelike wette werk nie. Die prys is reeds betaal. Jesus gaan nie weer sterf vir sonde wat ek môre gaan doen nie. Nee, Hy het klaar gesterf. Hy het die vyand reeds oorwin.
Beteken dit dat ons nou maar kan ophou met die ewige stryd teen die vlees? Nee, ons moet net ons posisie van oorwinning inneem. Ons moet aanvaar wat God reeds vir ons gedoen het en ons moet in oorwinning leef.
Lees:
Mediteer:
- Sukkel jy ook nog met sekere goed in jou lewe waarmee jy al so lank stoei om te oorwin?
- Laat die dinge wat jy net nie kan reg kry nie jou soos 'n mislukking voel?
- Probeer jy om die dinge waarmee jy sukkel met jou eie krag en eie probeerslae te oorwin?
- Dink jy dat jy die krag het om self met jou eie pogings die oorwinning te behaal?
- Dink daaroor dat Jesus reeds die volle prys betaal het en dat dit nie vir jou nodig is om uit eie krag die oorwinning te behaal nie. Jesus het klaar namens jou oorwin.
- Dink daaroor om iemand in die kerk te vra om saam met jou 'n pad te stap om die oorwinning wat reeds behaal is in besit te neem.
Bid:
Vader, ek dank U vir die afgehandelde werk aan die kruis. Dankie dat u vir elke sonde van my betaal het en ook aan my die heerskappy oor sonde gee in Jesus. Vader, baie keer is die vlees so sterk en dan struikel ek. Help my om my posisie van oorwinning in Jesus te verstaan en ook in te neem.
Spreek Lewe!
Ek is 'n wedergebore kind van God wat vrygekoop is van al my sonde en ek is nie meer 'n slaaf van sonde nie maar 'n kind van God. Saam met Jesus, die Heilige Gees, en medegelowiges kan ek 'n lewe van heerskappy leef.
Aanbidding:
Juanita du Plessis - Ons koning kom
Dag 2: Slaaf of vry?
Gal.5:1(NIV) It is for freedom that Christ has set us free. Stand firm, then, and do not let yourself be burdened again by a yoke of slavery.”
God het ons van die sondelas bevry. Ons word figuurlik met die las van die sonde gebore. Sonder Jesus Christus is ons verdoem tot 'n aardse lewe van skaamte, ongeregtigheid, gevangenisskap, ongelukkigheid, vrees en verlorentheid. God het ‘n ander plan. In Joh. 10:10 sê God dat Hy gekom het sodat ons lewe in oorvloed kan hê.
Nadat ons wedergebore is, is daar nog iets wat ons moet doen: then staan hier tussen twee kommas. Dit is of daar ‘n uitroepteken is en die skrywer van Galasiërs wil sê: Luister mooi en verstaan wat ek nou vir jou skryf. Jesus het jou vrygemaak en Sy plan is dat jy moet vry wees. Moenie nou toelaat dat jy weer gevange geneem word nie. Moenie toelaat dat sonde jou weer verstrik nie. Moenie weer 'n slaaf van die sonde word nie. Elke oomblik van die dag moet ons keuses maak. Dit verander nie aan die feit of ons gered is of nie. Gaan ons egter gered wees en die volheid smaak van wat God in Christus Jesus vir ons bedoel het om te beleef, of gaan ons daagliks probeer om uit ons eie krag keuses te maak en aan die sonde die mag te gee om ons te belas? Gaan ons in die tronk van slawerny bly waar die sonde ons verlam en ons vrymoedigheid wegneem?
Ons gedagtes moet vernuwe word. Ons moet ons kindskap opneem. Ons moet vasstaan in die geloof, sodat ons nie die las van sonde weer opneem nie. Die las van sonde is die dood. God se juk is sag en sy las is lig.
Baie kinders van God is vandag moedeloos en dit lyk of die hele wêreld se laste op hulle skouers rus. Ons moet onsself afvra: Het ek my identiteit in Christus vandag opgeneem en fokus ek vandag op die nuwe dag wat aangebreek het waarin ek vry van sonde en die las van sonde kan leef? Lewe ek my mandaat as wedergebore kind van God of dra ek die las van my sondige verlede en sien ek my in my menslike sondige natuur, of as bloedgewaste kind van God?
Vier elke dag die vryheid van sonde. Verbreek die kettings van 'n sondige identiteit deur daagliks oor te gee en die hulp van die Heilige Gees te vra. Leef in afhanklikheid van God en die krag en leiding van die Heilige Gees. Beleef elke dag oorgawe, oorwinning, vreugde en vrede in Christus Jesus.
Lees:
Mediteer:
- Ons moet vir onsself vra: Maak ons dit vir onsself moeilik om in vryheid en oorwinning te leef?
- Bedink die dinge wat jy in jou lewe toelaat. Waarna kyk jy op sosiale media en die internet? Het jy enige filters, of kyk en luister jy na enige iets wat verskyn?
- Hoe begin jy jou dag? Raak jy stil met Vader en maak sekere keuses oor jou dag? Waarna gaan ek kyk? Wat gaan ek doen as daar versoekings kom wat spesifiek die dinge is waarmee ek sukkel?
- Onthou vandag dat Jesus die volle prys betaal het en die oorwinning behaal het sodat ons nie meer in slawerny hoef te lewe nie. Ons moet dit egter opneem en deur sy krag daagliks keuses oor ons lewens maak.
Bid:
Vader, ek dank U vir kettings van houvas wat verbreek is. Vader, ek bely ook my vlees en my baie verkeerde keuses. Vergewe my vir die gemors waarna ek soms kyk of luister. Heilige Gees, kom help my met u sagte stem om elke dag goeie keuses te maak vanaf vroegoggend as ek opstaan en deur die dag wanneer daar 'n oorvloed van versoekings is en om na te kyk en na te luister. Heilige Gees, om help my om my gedagtes te vernuwe volgens Jesus se gedagtes.
Bonus: Spreek Lewe!
In Christus is ek vry- en losgekoop, kettings van sonde is verbreek. Ek is nou 'n seun/dogter van Vader en nie meer 'n slaaf van sonde en my vlees nie.
Aanbidding:
There is freedom (Official Lyric) – Josh Baldwin
Dag 3: Wet teenoor genade
Moontlik word dit deur trots veroorsaak: Die reaksie wat sigbaar is by mense van enige ouderdom - vanaf babas tot bejaardes - wanneer hulle die opdrag ontvang van "jy moet" of "jy mag nie".
God het met geduld en liefde eers die wet – die Tien Gebooie – vir sy volk gegee. Dit was baie basiese riglyne van wat aanvaarbaar is en wat nie. Dit was die basis van die verhouding tussen God en mens. Sonde het egter steeds 'n skeiding tussen God en mens gemaak. God se Seun het die prys vir ons sondes betaal en die vyand oorwin. Ons kan God nou in 'n intiemer verhouding beleef en, hoe nader ons aan God leef, hoe meer word ons aan sy beeld en gelykenis gelyk.
Omdat baie mense in verhoudings seergekry het, verkies hulle om uit verhoudings te onttrek en om enige vorm van intieme verhouding te vermy. Hulle vind veiligheid in die Tien Gebooie, want dan hoef nie hulle hart en siel oop te stel nie. In 'n verhouding met God is alles egter beter. Dit is die beter bedeling wat God vir ons aanbied. In die tabel hier onder kan die kontras gesien word tussen 'n verhouding wat deur die Wet bepaal word en 'n verhouding wat deur die Genade bepaal word:
|
DIE WET |
DIE GENADE |
|
Beveel |
Moedig aan |
|
Prestasie-georïenteerd |
Posisie-georïenteerd |
|
Voorwaardelik |
Onvoorwaardelik |
|
Bring vrees voort |
Bring liefde voort |
|
Oordeel |
Spreek vry |
|
Kondig skuld aan |
Maak ons skuldvry (blameless) |
|
Bewerk wraak/vyandskap |
Jesus is ons Vrede |
|
Lei tot sonde |
Lei tot goeie werke |
|
Oorwin mense |
Jesus is ons Oorwinning |
|
Wys tekortkominge |
Maak ons volledig in God |
|
Vereis geregtigheid |
Jesus is ons Geregtigheid |
|
Maak dood |
Jesus is ons Lewe |
|
Kan nie vervul word nie |
Jesus is ons Vervulling |
|
Kondig vloeke aan |
Geseënd en vrygespreek in Christus Jesus |
Lees:
Mediteer:
- Hoe beleef jy jou verhouding met Vader? Is dit 'n liefdevolle verhouding waar jy vreesloos na Vader kan gaan, of probeer jy steeds om God met jou lewe te beïndruk deur alles reg te doen?
- Dink jy dat jy die vermoë het om uit jou eie krag die wet te kan onderhou?
- Om onder genade te leef, beteken nie dat die wet wat God gegee het, verval het nie. Dit beteken eerder dat ons nie meer gemeet word aan ons eie vermoë om die wet te onderhou nie maar dat ons gemeet word aan die afgehandelde werk van Jesus.
- Vader het in Jesus 'n nuwe tydperk aangekondig waar ons nie op grond van ons eie vermoë gered word nie, maar waar ons deur wedergeboorte kan gaan en dan in 'n verhouding met Vader kan staan en deur sy Gees die vermoë ontvang om die wet van liefde te onderhou.
Bid:
Vader, dankie vir Jesus. Dankie vir genade waar ek nie iets hoef te doen om u liefde en seën te beleef nie. Vader, ek kies om in my posisie van geregtigheid te staan in Christus. Herinner my voortdurend deur die Heilige Gees aan wie ek in Christus is, dat ek nie meer onder plig en straf staan nie, maar dat ek onder genade in 'n liefdevolle verhouding met Vader staan. Amen.
Bonus: Spreek Lewe!
Ek is 'n kind van God. My Vader is 'n liefdevolle Vader na wie ek herhaaldelik kan terugkeer sonder om straf te verwag, maar om vergifnis, aanmoediging en vryspraak te ontvang.
Aanbidding:
Heaven help me – Zach Williams
Dag 4: In Jesus Christus het daar ‘n nuwe dag aangebreek
Ons gesin het al verskei kere ‘n piekniekmandjie en koffieflesse ingepak en dan klim ons voor sonsopkoms daarmee teen 'n koppie uit. Dit is vir ons verskriklik lekker om die nuwe dag te sien aanbreek. Al die elemente wat saamkom, maak dit 'n besonderse belewenis van God se handewerk.
- Jy asem die vars oggendlug in.
- Jy bring tyd saam met jou geliefdes deur.
- Die hemelruim verkleur met bloue en pienke, en dan word dit rooi, oranje en geel.
- Daar is 'n opgewondenheid oor die nuwe dag wat aanbreek en 'n afwagting om te sien waarmee die Here ons vandag weer gaan bederf.
Die oomblik wanneer Jesus Christus ons aanneem, breek daar 'n nuwe dag vir ons aan. Die son kom as't ware vir jou op en die lig breek deur. Ons kom onder 'n diepe bewustheid van die grootsheid en almag van God. Terselfdertyd beleef ons sy onbeskryflike liefde en genade. Ons voel lig. Daar val n las van ons skouers af. Ons harte het verander. Op daardie oomblik breek die lig deur en die hele landskap van ons lewe verander. Dit begin met 'n hartsverandering. Die oomblik wat ons die Here innooi, is daar ‘n feesviering. Die hemele juig as't ware. Ons beleef hoe die sondelas van ons skouers afval en dat ons vry is. Ons harte en gedagtes draai na God toe en weg van onsself, ons eie selfsugtige behoeftes en begeertes af. Ons harte wil God verheerlik en aan Hom eer bring. Ons wil God behaag en sy wil doen omdat ons so dankbaar en opgewonde is. 'n Nuwe dag het aangebreek. Laat ons die Here loof en daaroor bly wees!
- Ons is dood vir sonde en leef in Jesus Christus.
- Ons is vry in genade.
- Ons is vrymoedig om by God te wees.
- Ons het oorvloed en seën.
- Ons het liefde, vryspraak en die ewige lewe.
- Ons fokus verskuif vanaf onsself na die Koningkryk.
- Ons het die goeie boodskap ontvang – Evangelia – en nou moet ons dit verder oordra.
Lees:
Mediteer:
- As mense is ons bang vir verandering. Daarom twyfel baie mense of hulle die Here moet aanneem. Hulle weet aan die anderkant van die kruis moet hulle lewe anders lyk. Hulle is bang vir dit wat hulle moet prysgee. Hulle weet nie hoe hulle vriende daarop gaan reageer nie. Vir mense van ander gelowe is die prys om Jesus Christus aan te neem selfs nog hoër. Hulle verloor selfs hulle werk, word verwerp deur hulle familie en/of vriende en in baie gevalle (in Moslemlande) word hulle vermoor. Daar breek 'n nuwe dag aan wanneer ons Jesus Christus aanneem. Baie nuwe Christene probeer om in te skakel by die wêreld en om dieselfde as die wêreld te lyk. Hulle steek dan daardie morning glow weg wat God vir hulle gee om die wêreld na God toe te trek. Wanneer hulle die vrede en liefde, die vars opwinding van God ervaar in Christene se teenwoordigheid, begin hulle soek na dit wat Christene het. Hulle besef dat daar in hulle gees en siel 'n leemte is wat net gevul kan word deur dit wat die Christene het. Raak vandag net stil en besin daaroor. Het jy jou vreugde, blydskap, opwinding, jou morning glow verloor, of vra die wêreld vir jou hoekom lyk anders lyk? Wat maak dat jy so straal?
- As jy besef dat die wêreld op jou afgesmeer het en nie jy op die wêreld nie, vra die Here vanoggend om weer jou hart opnuut te vul, jou gedagtes gedurig te vernuwe, die leuens van die vyand te vervang met sy waarheid. Vra die Here dat jy jou morning glow terugsoek.
- Bid vir sensitiwiteit vir die Heilige Gees se stem.
Bid:
Vader, dankie vir redding in Jesus Christus en vir u Heilige Gees wat my gevul het en in my woon. Help my Here om opnuut op U te fokus en op dit wat U in u liefde en genade vir my gedoen het. Help my Here om nie bang te wees vir wat mense sê omdat ek anders lyk nie. Gee my moed om te leef in die vreugde van u magtige oorwinning oor hierdie wêreld. Laat mense U in my lewe raaksien en na U toe getrek word. Help my Here om my morning glow terug te kry. Maak ander mense opgewonde oor dit wat hulle sien wanneer hulle U sien in u lig wat deur my skyn. Amen.
Bonus: Spreek Lewe!
Ek het krag ontvang toe die Heilige Gees oor my gekom het. Mense kom na die Lig toe. Die Woord (Jesus) is die Lig en die Lig is die Waarheid. Die Waarheid maak my vry. Jesus Christus sal my nooit verlaat in alle ewigheid nie en sy lig skyn deur my.
Aanbidding:
Prys die Heer – Oasis Gemeente
Dag 5: Onder genade dra ons vrug
'n Boom word aan sy vrugte geken. 'n Boom wat appels dra is ‘n appelboom. 'n Boom wat vye dra is 'n vyeboom. Net so word mense ook aan hulle vrugte geken. Die Woord sê dat die vrug van sonde die dood is. Die vrugte van die Heilige Gees is liefde, vrede, vreugde, blydskap, selfbeheersing, sagmoedigheid, goedhartigheid, getrouheid, vriendelikheid en nederigheid. Die vrugte wat ons dra, trek mense na God toe, of stoot hulle weg van God af. Kinders van die Here moet altyd beskikbaar wees dat die Heilige Gees deur ons kan werk. Ons moet God connecters wees. Ons sal dit nooit uit ons eie krag kan doen nie. Ons word vertikaal met God versoen en dan moet ons horisontaal versoening met ander mense bewerk. Ons moet toelaat dat die Heilige Gees ons lei sodat ons instrumente kan wees om mense met God te versoen.
Die vrugte wat ons dra kan een van die maniere wees waarop ons God connecters kan wees deur lewens van integriteit te lewe en konsekwent te wees. Ons moet die skakel tussen die wêreld en God wees. Jesus was tydens sy wandel op die aarde vir ons 'n perfekte voorbeeld. Hy het aan die mense die Evangelie van goeie nuus verkondig, God die Vader aan die mense openbaar, en elke soort siekte of gebrek genees.
Lees:
Mediteer:
- Het jy al daaraan gedink dat jy die skakel tussen die mense om jou en God is?
- Het jy 'n hart vir verlore mense?
- Die manier waarop jy voor mense leef, kan mense met God verbind of van Hom wegstoot. Hoe lyk jou vrugte?
- Jy kan Vader vra om vir jou 'n hart vir verlore mense te gee.
- Dink aan mense wat jy ken of gereeld mee in aanraking wat wag om met Vader verbind te word en hoe jy 'n rol daarin kan speel.
Bid:
Vader, gee my weer 'n hart vir mense wat redding nodig het. Heilige Gees, werk deur my en gebruik my in die wêreld om mense met U te verbind. Ek gee myself aan U oor om deur u gebruik te word. Heilige Gees, maak my vol sodat ek u vrugte kan voortbring. Amen.
Bonus: Spreek Lewe!
Ek is kind van God, gevul met die Heilige Gees wat vrugte voortbring waar ek ookal beweeg.Deur my lewe word mense aan God verbind.
Aanbidding:
Louis Brits – Gekruisigde hande