FAMILY FOCUS
Neville Goodchild
Rol in die groter familie
Dag 1: Bloedlynvloek of vesting ‘stronghold’
Die prentjie sê ‘feel free’. Die Woord sê dat Jesus gekom het dat ons kan vry wees, nie vry voel nie. Hy het gekom dat ons kan lewe en dit in oorvloed. Verder staan daar dat almal wat gered is, die wat in Jesus glo as hulle Verlosser en Saligmaker, het God die reg gegee om Sy kinders genoem te word. (Joh. 1:12)
Geloof in God, Jesus Christus sy Seun en die Heilige Gees; redding deur die kruiswerk van Jesus Christus; doop met water en met die Heilige Gees; is die kern van ons geloof. Dit is wedergeboorte. Ons kan niks daar byvoeg of weghaal nie.
Baie keer as mense sukkel om vry te kom van sekere sonde is bloedlynvloeke die eerste ding wat Christene sê. Party mense is obsessief daaroor. Die probleem is dat dit skep die indruk dat die persoon die slagoffer is van ‘n ongelukkige verlede en dat hy nou maar die las van die vloek moet dra, bv. ‘Ons Van der Merwes is maar so humerig.’ Dit skep ‘n verskoning vir mense om maar te bly soos hulle is en nie in geloof ‘n pad te stap na oorwinning nie.
Die rede hoekom mense nie kan loskom van ‘n sonde nie, is 99% eerder dat die vyand ‘n vesting ‘stronghold’ het in die persoon se denke. Die mag van sonde en die dood is gebreek deur die kruiswerk van Jesus Christus. Verlossing begin by die vaste geloof in dit wat Jesus Christus gedoen het. Hardnekkige sonde is gewoonlik aangeleer oor geslagte waar kinders grootword en hulle ouers op ‘n sekere manier sien lewe. Kinders mimiek en neem die gewoontes van die ouers oor en verweef dit met wie hulle is. Seerkry in die lewe maak dat hulle verval in daardie vestings en dit word skynbaar onlosmaaklik deel van wie hulle is.
Toe ons jaag-jaag gespeel het as kinders, het ek soms in ‘n kamer in gehardloop en probeer om die deur toe te trek, sodat my ‘agtervolger’ my nie kan kry nie. Partykeer het my broer of suster dit egter reggekry om hul voet in die deur te kry. As hulle eers ‘n voet in die deur het, kon ek nie die deur toekry nie en het ek geweet ek gaan sukkel om hulle uit te hou. Iemand het eendag ‘n vesting vergelyk met so ‘n voet in die deur. As die vyand eers ‘n voet in die deur gekry het, vat dit meer intensionaliteit en aktiewe geloof om van die vesting ontslae te raak. Ons natuurlike reaksie is om altyd terug te gaan na daardie vorm van gedrag wat ‘n vesting geword het, maar Jesus het gekom sodat ons volkome vry kan wees.
God die Vader het van die grondlegging van die aarde beplan dat ons in gesinne moet leef en funksioneer, omdat daar baie seën daarin is. Mense fokus egter nie op dit wat God bedoel het om generasies te seën nie, maar fokus liewer op wat die vyand kom steel het. Kom ons fokus liewer op die generasie seën, soos God dit bedoel het.
LEES:
Mediteer:
- Dink daaroor dat jy ‘n kind van God is en dat die generasie seën in God lewe is en dit in oorvloed.
- Indien daar hardnekkige sonde in jou lewe is, weet dat jy kan vrykom en dat jy ‘n verantwoordelikheid het om die vestings in jou lewe in Christus Jesus af te breek. Kry hulp as jy moet.
Bid:
Abba Vader dankie dat ek in U familie is en dat ek oorvloedige seën beleef, omdat ek U kind is. Dankie vir generasie seën.
BONUS: SPREEK LEWE!
Ek is kind van God en daarom is ek geseënd.
Aanbidding:
Casting Crowns – Good Good Father ( Official Live Performance)
Dag 2: Vernuwing van jou denke
God het dit bestem dat die mens deur ‘n vrou gebôre sal word en sodoende in die wêreld sal kom. Niks en niemand kan dit verander nie.
Netso het God bepaal dat Jesus Christus sy goddelike bestaan sou neerlê en deur ‘n maagdelike swangerskap in die wêreld gebôre sou word, uit ‘n vrou. Jesus het tussen ons kom woon, waarlik mens en waarlik God.
Ons moet in die gees gebôre word, weergebôre word, uit God gebôre word. Ons kry ‘n nuwe bloedlyn. Dit is God se bloedlyn. Ons is dus vry van bloedlynvloeke as ons weergebôre is.
Hoekom sukkel ons dan nog om oorwinning te kry oor sommige sonde? Glo ons dan dat Jesus ons net bevry tot op ‘n sekere punt? Dat Sy werk onvolledig is?
Die feit is dat Jesus het ‘n volledige werk gedoen om ons totaal vry te koop en te verlos van ons bloedlyn.
Die probleem vir Christene is op ‘n ander vlak, die denke. Daar is steeds ou ingebrande gedagte patrone wat ons die heeltyd terugvat na ons ou manier van dink.
Paulus sê in Rom 12:2 dat ons moet ons gedagtes vernuwe na die gedagtes van Christus en sê verder in Fil. 4:8 dat ons moet ons gedagtes rig op die dinge daar bo.
Die probleem vir wedergebore Christene wat steeds sukkel met sonde of gewoonte patrone is 10 teen 1 hul denke wat nog nie vernuwe is nie, daar kan steeds ‘n “stronghold” in hulle denke wees en dit is nie demonies nie.
Die antwoord dus is dat die wedergebôre Christen na wedergeboorte die volgende stap moet neem om hul denke te vernuwe na “throne room thoughts”, om die dinge van Vader en Sy woord te bedink.
Lees:
Mediteer:
- Sukkel jy met iets wat jy so hard probeer om te los of om van vry te kom dat jy al wou opgee?
- Kan jy identifiseer met denke wat nie belyn is met God se denke nie? Iets soos; “ek is nou maar een maal nie goed genoeg nie”
- Het jy al Vader gevra om vir jou waarheid en woord te gee wat jy kan gebruik om jou ou gedagtes mee te vervang?
Bid:
Dankie Vader dat U my volkome vry gemaak het van vloeke in Jesus. Vader ek besef egter dat my denke in soveel areas nog nie vernuwe is volgens U woord nie. Vader help my deur U Gees om my denke te vernuwe na U Hemelse manier. Amen.
Bonus: Spreek Lewe!
Vir God is niks onmoontlik nie, net soos Hy my gered het, kan Hy my ook help om my denke te vernuwe.
Aanbidding:
Renew Your Mind | Latest Worship Song | Purpose (with Lyrics) | Romans 12:2 | Praise | Prayer | God
Laat U Wil - Riana Nel(Amptelike Musiekvideo)
Dag 3: Die seën van generasies
' OM hierdie rede buig ek my knieë voor die Vader van onse Here Jesus Christus, van wie elke geslag in die hemele en op die aarde sy naam ontvang, dat Hy aan julle mag gee na die rykdom van sy heerlikheid om met krag versterk te word deur sy Gees in die innerlike mens, ' EFÉSIËRS 3:14-16 (Afr. 53 Vert.)
Geslag in die Engelse vertalings word as ‘generation’ of ‘family’ vertaal. Die naam wat elke geslag gekry het van God kan positief of negatief wees. In Matt. 1 staan daar dat na Abraham tot by Daniël was daar 14 geslagte. Van Daniël tot by Babilon was daar 14 geslagte en vanaf Babilon tot by Jesus was daar 14 geslagte. In die Ou Testament sien ons dat daar geslagte was wat na God gekeer het en deur God geseën was; en dan is daar weer geslagte wat afvallig geword het van God, wat afgode aanbid het en wat vervloek was. God benoem elke geslag en is betrokke.
Om familie te seën is hoofsaaklik ‘n gebruik wat ons sien in die Ou Testament waar die pa die seuns seën. Dit gaan oor bloedlyn. Die volgende generasie word geseën.
In die Nuwe Testament word ons deur die bloed van Jesus Christus verlos van ons sonde en word ons deel van ‘n goddelike nageslag deur wedergeboorte. Ons het dieselfde bloedlyn as Jesus Christus en dus dieselfde Vader. Ons is dus geseënd omdat ons kinders van God is deur die bloed van Jesus Christus. Deur geloof in Jesus Christus en wedergeboorte is ons die geseëndes van God. Dit maak dus nie meer saak wat vorige geslagte gedoen het nie; wat die omstandighede was toe konsepsie plaasgevind het en ek gevorm is nie; wat my lewe was voor ek tot wedergeboorte gekom het nie of hoe goed of sleg my omstandighede nou is nie. Ek is geseënd, omdat God my Vader is. My bloedlyn in Christus Jesus is geseënd.
Efe. 3:16 verwys na die innerlike mens. Selfs ‘n mens se persoonlikheid word geïmpliseer deur wedergeboorte. Jou persoonlikheid verander nie, maar deur die vernuwing van jou denke, deur die werking van die Heilige Gees, vind daar genesing plaas en groei die persoonlikheid van die mens tot volwassenheid in Christus Jesus. Elke deel van ons menswees word geseën deur ons bloedlyn verbintenis met God ons Vader in die geloof en deur wedergeboorte.
Ons kan Efe. 3:14-21 gebruik as ‘n seën om ons familie en gesin te seën. Die gedeelte in die Amplified Engelse vertaling beskryf hierdie seën so mooi.
Lees:
Mediteer
- Kan jy as wedergebôre kind van God getuig dat jy geseënd is omdat jy deur Jesus Christus ‘n geseënde bloedlyn het?
- Besef jy wat dit beteken dat jy deel is van ‘n goddelike geslag?
- Lees hierdie seën in Efe. 3:14-22 in verskillende vertalings en laat dit jou gedagtes vernuwe, sodat jy verstaan wie jy is in Christus Jesus en wat die implikasie van hierdie seën in jou lewe is.
Bid:
Abba Vader dankie dat ek U kind is deur my redding in Jesus Christus, geloof en wedergeboorte. Dankie dat ek aan U bloedlyn verbonde is en uit U gebôre is. Dankie dat ek geseënd is. Amen.
Bonus: Spreek Lewe!
As kind van God is my bloedlyn geseënd.
Aanbidding:
This Drop of Blood – Ron Belcher
Dag 4: Die eienskappe en doel van familie
God het dit so beskik dat ons in families funksioneer en om ons te seën in families. Ons sien dat die hele Bybel is van die begin tot die einde gefokus op die instelling van familie. In Gen. 2 sien ons dat Adam vir God sê dat hy alleen is. God skep vir Eva en hulle kry kinders. Hulle word die eerste gesin. In die laaste twee hoofstukke van die Bybel, Openbaring 21-22 sien ons dat die Here ons sal beloon vir ons dade en ons sal deel wees van die familie van Christus. Ons sal vir ewig en ewig saam met God wees. Dit is dan ons familie. Sodra ons tot bekering kom word ons deel van die goddelike familie.
Goed wat ons moet onthou van familie:
- Families kom in verskillende grotes en vorms. (Man, vrou en kinders; enkelouer en kinders; saamgestelde families)
- Elke persoon in die familie vertolk verskillende rolle. Een persoon kan dus ‘n seun, pa, broer, oom en neef wees.
- Daar is nie iets soos ‘n perfekte familie nie.
Waarom het God familie geskep?
Kamaraadskap: God het familie geskep sodat die mens kamaraadskap kan beleef; sodat die mens weet wat dit is om ‘n maat te hê en nie die pad alleen hoef te stap nie. Gen. 2:18
Daar is krag in kamaraadskap. As jy in ‘n huwelik is, maar jy verstaan nie saam nie, verswak die verhouding. Daar is altyd ‘n verskoning om nie saam te doen nie en dit verswak die eenheid. Dit briek die dinamika van die huwelik en frustreer die partye in die huwelik. Daar kan nie suksesvol gebou word nie en inovasie en groei word gekelder. Die familie kan dan nie die vrug van kamaraadskap beleef nie en die diepte van ‘n verhouding waar ons saam doen nie.
Model van verhouding en liefde: God skep die huwelik as ‘n model om die liefde in verhouding uit te druk. Dit is baie keer vir ouers onmoontlik om in woorde te beskryf hoe lief hulle vir hulle kinders is. Voor die kansel sien mens baie keer dat die paartjie huil, omdat hulle woorde ontbreek om in woorde hul liefde vir mekaar uit te druk. Hierdie is ‘n beeld van goddelike liefde. Hier sien ons iets van die liefde van God. Dit is baie belangrik om hierdie liefde in die familie te beleef om in verhouding met God te kan leef en God se liefde te kan ervaar. Dit is hoekom kinders wat in huise groot geword het met ‘n afwesige pa, kinders wat nie ‘affirm’ is nie en wat nie vader liefde ervaar of verstaan nie, kan nie die liefde van God begryp nie. Hulle sukkel met die liefde van God en dit oorskadu hulle verhouding met God. Hulle identiteit is ook nie vasgelê nie en hulle sukkel om te ‘behoort’.
Voertuig: Die familie is ‘n voertuig om geloof van geslag tot geslag oor te dra. Goddelike redding (Hab. 2) word oorgedra van ouers na kinders. Ons sien dat dit die rede is waarom die vyand huwelike en familie aanval. Sodra daar wrywing tussen die ouers ontstaan is daar skeiding van God. Daarna begin daar konflik tussen die kinders. Die sondeval gebeur en Adam en Eva is in konflik, daar is skeiding tussen hulle en God en hulle word uit die tuin gegooi in die wildernis in. Die volgende wat gebeur is dood tussen die kinders. Kian maak vir Abel dood.
Ons sien dat weereens kom red God ons deur familie. Josef en Maria trou en Jesus word gebôre. Familie bly die model van God se plan vir ons om geloof en redding oor te dra van geslag na geslag. Die familie op aarde is ‘n profetiese model vir ons ewige goddelike familie.
Familie is ‘n seën.
Lees:
Mediteer:
- Raak stil en bid oor jou familie. Laat die Heilige Gees die belangrikheid van familie aan jou openbaar.
- Wat is die struktuur en die samestelling van jou gesin en familie? Maak nie saak hoe daardie familie lyk nie, moet dit nie vergelyk met ander families nie, want jou realiteit is al waarmee jy kan werk. Dink bietjie oor die verskillende rolle wat jy in jou familie vertolk. Onthou dat daar is nie iets soos ‘n perfekte familie nie en in elke familie struktuur kan ons die doel van familie vervul.
- Laat die Heilige Gees jou lei en wys hoe jou familie kan groei om die doel van familie te bereik:
- Hoe kan julle saam goed doen en die kamaraadskap in die familie bevorder?
- Hoe kan julle geloof en liefde van God oordra na die volgende geslag?
- Dink jy dat jou gesin is ‘n model vir die volgende geslag wat dit vir hulle makliker maak om die konsep van ‘n goddelike familie beter te verstaan.
Bid:
Dankie Vader vir familie en dankie dat ons U liefde vir die mens beter kan begryp vanuit die struktuur van familie. Help asseblief gesinne waar daar onmin en konflik is om dit uit te sorteer en herstel weer eenheid in families waar daar nie meer eenheid is nie. Help ons om in Christus Jesus die volheid van familie te beleef en oor te dra van geslag tot geslag. Amen.
Bonus: Spreek Lewe
Familie is God se gekose model van Sy Koninkryk. God seën ons in ‘familie’.
Aanbidding:
Casting Crowns – Nobody (Official Music Video) – ft. Matthew West
Jamie MacDonald - My Family (Official Music Video)
Dag 5: Bou jou familie se toekoms
‘You can’t go back and change the beginning, but you can start where you are and change the ending.’ C.S.Lewis
Vier keuses wat jy kan maak om jou familie se toekoms te verander:
Ons is ‘n God-eerste familie. In Josua 24:15 het Josua die volgende gesê: ‘Al die afgode is voor julle en julle kan self kies, maar ek en my huis, ons sal die Here dien.’ Nadat Josua hierdie stelling gemaak het tot nou, was daar nog nooit weer ‘n geslag op die aarde, waarvan niemand die Here gedien het nie. Elke geslag was daar mense wat God gedien het. Dit is hoe dinamies dit is as ons ‘n familie word wat God eerste stel, maak nie saak wat gebeur het, wat besig is om te gebeur of wat gaan gebeur nie. Jy kan van hierdie oomblik af besluit om God eerste te stel in jou familie en so bou na ‘n volkome toekoms en die beste uitkoms vir jou familie.
Ons is ‘n ‘intensioneel saamgevoegde’ familie. Ons is nie maar net bymekaar, omdat ons ‘n fout gemaak het of oor omstandighede nie. Al maak ons verkeerde besluite en is ons soms ontrou, God bly altyd getrou. Besluit vandag dat maak nie saak hoe ons familie bymekaar gekom het nie, God het ‘n doel en ‘n funksie met ons familie. Daar is vier goed wat ‘n intensioneel saamgevoegde familie doen:
- Spandeer tyd saam – Ons moet goed saam doen en saam tyd spandeer.
- Aanraking – Liefdevolle aanraking is belangrik.
- Gesprekke – Ons moet praat oor goed.
- Tradisies – Begin en vier tradisies wat uniek is tot ons familie.
- Jou getuienis/storie – Vertel jou storie van redding en verlossing in Christus Jesus.
Ons is ‘n familie vol genade. Hoe bewys ons genade? Ons gaan eerste om reg te maak. Ons is eerste om ons foute te erken. Ons is eerste om ons beste te gee. As jy sê: ‘Ek sal nie.’, dan is daar nie genade nie.
Ons is ‘n generasie-gefokusde familie. Wees ‘n familie wat bou aan die toekoms van ons kinders en kleinkinders. Hierdie fokus is nie net op die finansiële en fisiese nie, maar ook op die geestelike en emosionele. Ons moet bou aan 'n generasie wat begryp wat dit is om familie te wees en wat dit weer gaan oordra na die volgende geslag.
‘Laat ons nie moeg word om goed te doen nie, want op die regte tyd sal ons maai as ons nie verslap nie.’ Gal. 6:9
Lees:
Mediteer:
- Maak vandag ‘n keuse om jou familie se toekoms aktief te bou deur:
- God eerste te stel in die familie
- Intensioneel te bou aan ons familie deur tyd saam te spandeer; mekaar aan te raak; Gesprekke te hê; vol genade te wees vir mekaar en deur te fokus op generasies wat kom.
Bid:
Abba Vader, Seun en Heilige Gees dankie dat ek deel kan wees van familie op aarde en dat ek die saam met my mense vandag kan besluit om U eerste te stel in ons familie en intensioneel te bou aan ons huwelik. Amen
Bonus: Spreek Lewe!
Familie is God se plan vir volhoubare redding en gemeenskap van gelowiges.
Aanbidding: