God se plan van hoop met die kerk en die kruis!
Neville Goodchild
Ons
Dag 1: Die kerk se verlede en die toekoms
Van die meeste instansies wat bestaan, is die kerk een van die oudstes. Die kerk het regdeur die geskiedenis 'n groot rol gespeel, soms selfs 'n groter rol as die regerings van sekere lande. Waar daar geskiedenis is, is daar 'n verlede. Die verlede is egter nie noodwendig vir almal 'n goeie herinnering nie. Inteendeel, veral met betrekking tot die kerk, het baie mense 'n verlede van teleurstelling. Weens konflik, misverstande of verskille het baie mense seergekry en in baie van hierdie gevalle vorm dit aanklagte teen die kerk. Gedagtes soos “Die kerk is nie meer relevant nie” of “Kyk hoe word mense seergemaak deur die kerk”, ontwikkel en dryf mense weg van die kerk af. Ongelukkig word die meeste van hierdie teleurstellings veroorsaak as gevolg van die dinamika van verskillende mense wat bymekaarkom.
Ons sukkel onder sulke omstandighede om te onthou dat die kerk deel vorm van God se plan. Alhoewel daar 'n verlede is waar mense seergekry het, is daar 'n groter toekoms wat wag. Hierdie toekoms is bedoel vir die kerk - een liggaam wat in eenheid saam werk vir die bevordering van God se Koninkryk. Wanneer Vader God 'n goeie toekoms aankondig, is dit in meeste gevalle as belofte aan sy hele volk gegee en nie net aan spesifieke individue nie.
“MAAR nou, so sê die HERE, jou Skepper, o Jakob, en jou Formeerder, o Israel: Wees nie bevrees nie, want Ek het jou verlos; Ek het jou by jou naam geroep; jy is myne! As jy deur die water gaan, is Ek by jou; en deur die riviere — hulle sal jou nie oorstroom nie; as jy deur vuur gaan, sal jy jou nie skroei nie, en die vlam sal jou nie brand nie. Want Ek is die HERE, jou God, die Heilige van Israel, jou Heiland; Ek het Egipte gegee as losprys vir jou, Kus en Seba in jou plek. Omdat jy kostelik is in my oë, hooggeag is, en Ek jou liefhet, daarom gee Ek mense in jou plek en volke vir jou lewe.” Jesaja 43:1-4.
Die Here het jou vreeslik lief, maar sy hart lê ook by die kerk, die liggaam van Christus. In die eenheid van gelowiges wat saam is, breek God se hoop los. Jy ontdek daar wat jou spesifieke rol in die liggaam is, of dit nou ‘n hand of 'n voet is, of saam met die res van die liggaam funksioneer om 'n groter doel te bereik.
Lees:
Mediteer:
- Het jy al self seergekry in 'n kerk?
- Alhoewel die gevoelens sterk mag wees, vra Vader God vir elke een van ons om ander mense te vergewe soos wat Hy ons vergewe het (Mat. 6:15). Die eenheid in die kerk wat belemmer word deur onvergifnis, verhinder die Here se werk nie net in die kerk nie, maar ook in jou lewe.
Bid:
Vader God, dankie dat U my liefhet en vir my 'n goeie toekoms beplan. Soms kan mense in die kerk my seermaak deur die manier waarop hulle optree of die dinge wat hulle sê. Bewaar my hart teen bitterheid en help my om altyd, soos U, vergewingsgesind te wees en genade te hê vir ander mense soos wat U genade vir my het. In Jesus se Naam, amen!
Bonus: Spreek Lewe!
Saam is daar 'n toekoms van God se bonatuurlike guns en ongelooflike goedheid wat wag!
Aanbidding:
Broken Vessels (Amazing Grace) - Hillsong Worship
Dag 2: Huwelik, 'n profesie
“If we are married, you can’t get there until we both get there.” - Marinette van Coller aan haar man, Paul van Coller, oppad om te gaan visvang.
Hierdie woorde het 'n groot implikasie. Vader God het 'n beginsel neergelê wat geldig is alle huwelike. Dit is die beginsel van eenheid. Waar daar nie eenheid is nie kan God se guns en se seën nie losbreek nie (1 Pet. 3:7), maar daar waar wel eenheid is, God will command His blessing (Ps. 133:1-3 AMP). Die huwelik is die instelling van God wat die wesenlikste impak van eenheid voel' As ons wil sien hoe daar ‘n verskil in ons gemeenskap kom, behoort ons te begin by eenheid in die huwelik.
Waarom is dit vir God so belangrik? Vader God het bepaal dat die huwelik, die verhouding tussen man en vrou, vir die wêreld sal wys hoe die verhouding tussen God en die mens behoort te lyk. Die rol van man en vrou in die huwelik is uniek, maar daar is ook 'n wedersydse opdrag vir hulle om te vervul. Dit is om die beste vir die ander persoon te soek. Dit is soos Jesus sy Bruid (die Kerk) hanteer en daarom word die huwelik 'n weerspieëling van die verhouding wat Jesus met die mensdom wil hê.
Die opdrag aan mans is om verstandig met hulle vrouens saam te leef en hulle te eer. Jesus kies om mense te eer, alhoewel hulle nie skoon, sondeloos, geregtig, of heilig is nie. Nogtans gee Hy aan hulle juis dit wat hulle nie verdien nie. Die manier hoe Hy ons hanteer, was ons skoon en maak ons heilis sodat ons aanvaarbaar en gereed sal wees vir Hom. Vir die vrouens is die opdrag gegee om onderdanig te wees aan die mans en hulle te ondersteun. Net so is die Kerk geroep om Jesus te volg en die Koninkryk te bevorder deur Hom te help om mense te bereik en sy liefde oor te dra.
Daar is oorgenoeg afleidings in hierdie wêreld om mense weg te hou van God af. As ons graag wil hê dat mense na Jesus toe draai, is ons huwelike die eerste plek waar ons moet begin. Wanneer ons leer om in huwelik 'n goddelike eenheid te bereik, kan ons dit na die kerk toe bring. As die mense in die kerk dan in eenheid begin funksioneer, sal daar 'n seën losbreek wat die wêreld na God se Koninkryk toe gaan trek. Ons gaan deelneem, sien en beleef hoe die Here transformasie in gemeenskappe bring wat 'n baken van lig sal word vir almal wat gebroke is.
Lees:
Mediteer:
- Getroude man, ervaar jy eenheid met jou vrou? Het jy jou vrou lief soos wat Christus die kerk liefhet? Indien nie, vra vir Jesus om vir jou te wys watter struikelblokke julle verhinder om eenheid met mekaar te beleef en raak dan ingestel om soos Jesus jou vrou te eer en haar beste belange op die hart te dra en, soos Jesus, jou lewe vir haar af te lê.
- Getroude vrou, ervaar jy eenheid met jou man? Nooi vir Jesus in om leiding te gee en vir jou te wys wat in die pad staan daarvan. Fokus ook daarop om jou man te ondersteun en te volg in die rigting waarheen hy jou lei, tensy dit teen God se wil is. In sulke gevalle eer hom altyd, maar wees eerstens getrou aan God se opdragte en bid vir eenheid in julle huwelik.
- Strewe jy na eensgesindheid met die mense in jou gemeente? Daar waar ons eenheid ervaar in die liggaam van Christus en die belange van mekaar dra, vind ons dat ons soveel meer kan bereik as wat ons uit ons eie krag sou kon doen.
- ‘n Praktiese manier om eenheid te ontwikkel, is deur gebed. Begin vir mekaar bid en op die Here vertrou dat alles wat jy graag van die Here sal wil vra, vir die mense vir wie jy bid gegee sal word.
Bid:
Here Jesus, u liefde het my skoongewas en my heilig gemaak. U het deur genade my kom ontmoet en u lewe neergelê sodat ek vir U aanvaarbaar sal wees. Help my om eenheid na te streef in my verhoudings en veral in die huwelik. Gebruik dit as 'n profesie van u terugkoms en laat mense u lig sien daardeur sodat hulle na U toe sal kom en nuwe lewe sal kry. Ek prys u Naam, Jesus! Amen.
Bonus: Spreek Lewe!
Where there is unity, God commands His blessing!
Aanbidding:
Dag 3: Met die oog op Christus en die gemeente
Saamwees, saam lewe en saam groei is die kerngedagte van Kerk. Net soos in die huwelik is ons geroep om saam te beweeg en saam die Koninkryk te bereik. Soms glo ons dat ons diep ervarings en ontmoetings met God net op ons eie kan beleef. Dit klink dalk natuurlik om vir God te gaan ontmoet, êrens alleen in die wildernis, maar God is nie 'n natuurlike God nie en dit waarmee Hy besig is, is bonatuurlik. Sy gedagte en plan was dat ons God se Koninkryk die meeste sal sien waar ons saamkom.
Terwyl ons fokus op die opdragte van God oor die huwelik, is dit altyd met die oog op die verhouding tussen Christus en sy gemeente. Wanneer die Bybel verwys na die Bruid van Christus, verwys dit na die kerk. Dit wil sê, alhoewel ons weet dat Jesus ons liefhet en aan ons genade bewys, kan ons nie sy bruid genoem word, wanneer ons nie deel van die Kerk is nie. Dink 'n oomblik hieroor na hieroor.
God se plan vir jou lewe sluit altyd ander mense in. Eerstens, mense wat saam met jou die pad sal stap en ook die mense na wie jy toe gestuur word om hulle ook deel te maak van hierdie reis na die glorie van God toe (Ps. 84:5-7 MSG). Selfs Jesus het homself omring met gelowiges wat saam met Hom die pad sou stap. Dit was nie omdat Jesus self nie genoeg was nie, maar hiermee wys Hy vir ons dat Vader God nie bedoel het dat enige van ons ooit alleen sou wees nie.
Lees:
Mediteer:
- Is daar mense saam met wie jy die pad stap?
- Verlang jy na 'n vervullende roeping wat jy kan uitleef vir die Here?
- Daar is 'n spesifieke doel waarvoor jy gemaak is, maar daar is ook 'n konteks waarbinne jy dit sou uitleef. Die Kerk bied 'n veilige omgewing waarbinne jy kan groei en ontdek wat jy gemaak is om te wees.
Bid:
Vader God, U het 'n plan met my lewe. Wys my wat U deur my wil doen en help my om u volle plan te ontdek saam met die mense wat U ook om my geplaas het. Jesus, net soos U vir u dissipels 'n doel gegee het terwyl hulle saam met U gereis het, help my ook om my doel te ontdek en U ten volle te volg.
Bonus: Spreek Lewe!
Saam kan ons baanbrekerswerk vir die Koninkryk verrig! Ek is nie alleen nie en ek kan ook vir ander mense ondersteuning gee sodat hulle kan weet hulle is nie alleen nie.
Aanbidding:
Mighty To Save - Hillgsong Worship
Dag 4: Wat God wil sê
“Aan my, die geringste van al die heiliges, is hierdie genade gegee om onder die heidene die evangelie van die onnaspeurlike rykdom van Christus te verkondig, en vir almal aan die lig te bring wat die gemeenskap is van die verborgenheid wat van alle eeue af verborge was in God wat alles geskape het deur Jesus Christus, sodat nou deur die gemeente aan die owerhede en magte in die hemele die menigvuldige wysheid van God bekend gemaak kan word.” Efésiërs 3:8-10.
Dit wat God wil sê, wil Hy deur die kerk sê. Aan die owerhede en die magte in die hemele sal die menigvuldige wysheid van God bekendgemaak word. Aan ons is genade gegee om die ongelooflike rykdom van Christus aan mense te verkondig. Die stemme wat waarlik gehoor sal word, is nie net die stem van een persoon nie. Een mens kan lewens om hom verander deur die goeie nuus van Jesus na mense toe te bring. Waar die waarheid egter gedeel word deur 'n groep mense wat dieselfde openbaring verklaar, word gemeenskappe verander.
God se antwoord vir die toestand van hierdie wêreld is te groot vir een persoon om te deel. In die verhale van die Ou Testament het die Here nie net een mens gekies om 'n lig vir die wêreld te wees nie, maar sy hele volk. Jesus sê in Matthéüs 5:14 dat 'n stad wat bo-op 'n berg lê nie weggesteek kan word nie. Daar is 'n roeping vir elke mens se lewe, maar nog 'n groter roeping waar daardie mense saamkom om om te strewe na een doel. Een skerp en onmisbare lig word gevorm deur 'n versameling van baie klein liggies. Jy is lig en sout vir hierdie wêreld, maar jou lig is gemaak om bygevoeg te word by die lig van jou geestelike broers en susters om jou.
Lees:
Mediteer:
- Wat is die openbarings wat jy al by die Heilige Gees gehoor het?
- Wie is jou geestelike familie waarmee jy ‘n nabye pad stap?
- Hoe kan jy jou roeping en doel belyn om saam met die mense om jou te strewe na 'n doel wat groter is?
Bid:
Jesus, U wys vir ons dat ons gesamentlike pogings om die Koninkryk van God te laat kom 'n groot transformasie in ons gemeenskappe bring. U het deur u dissipels ook wonderwerke gedoen en hulle uitgestuur na mense by wie U nie kon uitkom om te bedien nie. Maak my deel van u planne wat groter as myself is en help my om mense te vind met wie ek kan saamwerk om u Koninkryk te bevorder. Ek prys u Heilige Naam, Jesus! Amen.
Bonus: Spreek Lewe!
Dit wat ons saam kan vermag, is soveel groter as enige iets wat ons op ons eie kan doen. Ons gesamentlike werk kan ons gemeenskap verander wat dan ons land kan verander en begin om die wêreld te verander!
Aanbidding:
Dag 5: Hieraan sal almal weet dat julle my dissipels is
Die wêreld kyk met 'n baie kritiese oog na die Kerk. Baie mense soek doelbewus na die negatiewe dinge wat hulle in gelowiges se lewens kan raaksien. Dit is eintlik die ideale geleentheid om vir hulle te kan wys hoe lyk 'n lewe wat deur Jesus volgemaak is. Daar is slegs een manier om vir die wêreld te wys dat ons getransformeer is en dat ons iets beter het om aan te bied. Jesus sê almal sal weet dat ons sy dissipels is wanneer ons mekaar liefhet soos wat Jesus ons liefhet, want Jesus het lief op 'n manier wat die wêreld nooit sal ken nie, behalwe as hulle Hom leer ken nie.
Hierdie oë wat so aandagtig na ons kyk lyk baie keer kwaadwillig, maar eintlik is dit gevul met 'n diepe verlange na hoop en na lewe. Hierdie wêreld het niks om aan te bied nie en eendag sal mense besef dat daar werklik vir hulle niks was om te verkry nie. Ons het die verantwoordelikheid, maar ook die voorreg om aan mense te wys dat daar meer is as wat die wêreld het om aan te bied.
Wanneer ons saamwerk en die beste vir mekaar soek, kan die wêreld nie anders as om aangetrokke te wees tot die lewegewende hoop wat mense uitleef daar waar baie liefde is om te deel nie. Terwyl daar so baie gebrokenheid in hierdie wêreld is, sal mense altyd bly glo in liefde. Die Here het geweet dat liefde nie kan faal nie en het gekies om liefde te bied wat nooit weggeneem kan word nie. Hy is die God van liefde. Hyself is die bron van liefde. Ons is sy ambassadeurs en daarom moet ons ook liefde lewe soos wat Hy dit doen. As ons mekaar liefhet en saam die wêreld begin liefhê, sal mense na die goedheid van God toe stroom.
Lees:
Mediteer:
- Hoe hanteer jy jou vriende en familie?
- Is die manier waarop jy teenoor ander optree 'n antwoord vir die wêreld?
- Alhoewel ons nooit sondeloos sal wees soos Jesus nie, het Hy vir ons die opdrag gegee om onvoorwaardelik lief te hê en altyd genade aan die mense om ons te betoon. Aangesien ons vergifnis ontvang het en God ons onvoorwaardelik liefhet, kan ons vergewe en liefhê.
Bid:
Vader God, U is liefde! U gee vir my liefde en ek kon nog nooit iets daarvan verdien nie. Daar was tye in my lewe toe ek vir myself gelewe het en U nie geag het nie, maar nou wil ek met my lewe ook sê dat ek U liefhet en aan u behoort! Help my om mense om my onvoorwaardelik lief te hê en met my vriende en my familie te begin. Gebruik my om vir hierdie wêreld te wys dat daar meer is. In Jesus se Naam, amen!
Bonus: Spreek Lewe!
Liefde sal altyd wen. Vader God sal altyd deurkom. Daar waar ons begin om God se liefde aan ander mense oor te dra, sal niks in die pad van sy reddende krag kan staan nie.
Aanbidding: