OORTUIG VAN SY LIEFDE
Neville Goodchild
Wat ek glo van Sy liefde bepaal hoé ek glo in my lewe
Dag 1: Is my geloof geaktiveer?
Daar is baie Christene wat sukkel om hulle geloof te aktiveer. Hulle kan oor die konsep van geloof praat, Skrif aanhaal en na die geskiedenis van Jesus Christus verwys, maar dit is vir hulle moeilik of ongemaklik om hulle getuienis te deel. Daar is min sigbare getuienis van die kragtige werking van die Heilige Gees in en deur hulle.
Intellektuele, akademiese of konseptuele geloof is nie die volheid van die Koninkryk van God nie. Die wêreld probeer dikwels om geloof intellektueel uit te redeneer, maar Paulus sê:
“en my rede en my prediking was nie in oorredende woorde van menslike wysheid nie, maar in die betoning van gees en krag, sodat julle geloof nie in wysheid van mense sou bestaan nie, maar in die krag van God.” (1 Kor. 2:4-5).
Een eenvoudige manier waarop ons die werking van die Gees en krag kan begin beleef, is wanneer ons oor alles begin bid.
Wanneer ons geloofsoortuigings deur die werking van die Heilige Gees in aksie oorgaan—soos wanneer ons bid—word ons geloof geaktiveer. Ons begin nie net weet wat ons glo nie; ons begin dit uitleef.
Die Woord van God word lewendig in ons lewe wanneer dit deur die Heilige Gees toegepas en prakties uitgeleef word.
Geloof is nie net iets wat ons verstaan nie. Geloof is iets wat ons deur die krag van die Heilige Gees uitleef!
Lees:
Mediteer:
- Hoe leef ek my geloof uit—intellektueel, konseptueel of prakties?
- Wat wys my lewe prakties van wat en hoe ek glo?
- Waar kan ek vandag my geloof in aksie bring?
Bid:
Vader, help my asseblief om nie net die Skrif te bestudeer en U waarheid te leer sodat ek daaroor kan vertel nie, maar ook om my geloofspiere te oefen deur die krag van U Heilige Gees in en deur my.
Leer my om op die werking van U Heilige Gees staat te maak en om my geloof prakties uit te leef. Help my om nie net te praat sonder vrug nie, maar om gelowig te doen wat U Woord sê.
Laat my lewe voortdurend getuienis lewer van U werking in my en deur my.
In Jesus se Naam.
Amen.
Bonus: Spreek Lewe!
Geloof is nie net iets wat ek weet nie; ek leef my geloof prakties uit! Deur die krag van die Heilige Gees is my geloof aktief en sigbaar.
Aanbidding:
Dag 2: Beloved
Vanoggend maal hierdie lied deur my:
“You take me just as I am,
You’d choose me all over again.
I am the one You love!
I don’t have to prove anything.
There’s room at Your table for me.
I am the one You love, I am the one You love!”
Ek besef ek moet stil word in hierdie oomblik en net indrink wat die Gees besig is om in my hart te stir, toelaat dat die Gees van die Here my bedien:
“Your love, Your love never fails,
Your love never fails.”
Wat glo ek van God se liefde vir my? Want wat ek glo, bepaal hóé ek my geloof in my lewe uitleef. Dit bepaal hoe ek leef!
Ek weet dat God die wêreld so liefgehad het (Joh. 3:16), maar besef ek God se uitnemende liefde vir my persoonlik? Aanvaar ek dat Hy gekies het om my lief te hê, ongeag? Dat Sy onvoorwaardelike liefde vir my werklik onvoorwaardelik is? Besef ek dat God se karakter volmaak en onveranderlik is? Dat Hy getrou is aan Homself?
God se liefde begin nie by wat ek doen nie; dit begin by wie Hy is en by Sy keuse om my lief te hê.
So, wat beteken dit vir my? Wat is dan die verskil tussen om my geloof uit te leef – geloof in aksie – en om op my eie werke te vertrou? En hoe weet ek of ek reg glo?
Dit is hier waar God my geloof begin aktiveer: wanneer ek ’n ontmoeting met Sy liefde het. Wanneer ek besef dat Hy alles gedoen het wat Hy gedoen het, omdat Hy my persoonlik liefhet – en deur Sy Gees my daarvan oortuig.
Hy het lankal reeds Sy gedagtes oor my uitgesorteer. Daarom het Hy, in Sy volmaakte liefde, alles gedoen om my met Hom te versoen. Hy het Sy liefde prakties aan my bewys en my die keuse gegee om Hom terug lief te hê.
Maar vóór dit, voordat ek enigiets doen, voordat ek selfs die vermoë het om iets vir Hom te doen, het Hy my onvoorwaardelik lief.
Soos ’n baba wat hoor: “Jy is my geliefde seun/dogter, oor jou verheug Ek My.” Hierdie baba kan nog nie terugliefhê of enigiets doen om daardie liefde te verdien nie.
Die baba is net geliefd!
God het jou liefgehad voordat jy enigiets kon doen om Sy liefde te verdien.
Jou gedrag bepaal nie God se liefde vir jou nie. Jou gedrag skep nie God se liefde vir jou nie.
En juis hier begin jou geloof geaktiveer word: wanneer jy besef hoe lief God jou het!
Lees:
Mediteer:
- Hoe voel God oor my?
- Hoe wys Hy Sy liefde aan my?
- Wat is die verskil tussen my geloof in aksie en eie werke?
Bid:
Vader, ek word stil. Openbaar Uself, U liefde aan my asseblief.
U is uitnemend en U karakter staan vas. U is liefde. Dankie vir die manier waarop U my nader getrek het en my oortuig het van U liefde vir my. Dankie dat U liefde onvoorwaardelik is. Dankie dat ek niks kan doen om U liefde te verdien nie, en dat my tekortkominge ook nie kan maak dat U ophou om my lief te hê nie. Dankie dat ek geliefd is. Amen
Bonus: Spreek Lewe!
Ek is geliefd! My dade bepaal nie God se liefde vir my nie.
Aanbidding:
The One You Love – Elevation Worship
Dag 3: Geloof in
As ons geloof geaktiveer is, sal dit in ons lewens sigbaar word. Jakobus 2:18 sê:
“Wys my jou geloof sonder die werke, en ek sal jou uit my werke my geloof wys.”
Ons het hier te doen met geloof wat oorgaan in aksie. Maar ons geloof moet iewers vandaan kom. Dit moet op iets gebou wees voordat ons by hierdie stap kan uitkom.
As ons aksies nie uit geloof gebore word en met die krag van die Heilige Gees gepaardgaan nie, is ons besig met eie werke – godsdiens.
Ons leer dikwels vir mekaar dat liefde voorwaardelik is: “As jy dit doen, dan sal ek dat doen.” Ons tree soms op subtiele maniere so op met ons kinders, ook met vriende, familie of eggenote.
“Ek sal jou liefhê as jy getrou bly aan my.”
“Ek het jou lief omdat jy só is – of eintlik omdat jy hierdie of daardie ding doen.”
“Ek sal nie dit doen as jy nie dat doen nie.”
Ons kan dan maklik dieselfde beginsel op God toepas.
Net soos ons, het Martha gesukkel om dit te verstaan. Sy het Jesus liefgehad en Hom gedien. Toe haar broer Lasarus siek word, stuur sy en Maria ’n boodskap aan Jesus. Maar Jesus kom nie betyds volgens hulle verwagting nie. Lasarus sterf.
Wanneer Jesus uiteindelik kom, word Martha se geloof in ’n krisis geplaas. Sy weet Hy kon iets gedoen het. Sy weet Hy is magtig. Maar nou lyk haar omstandighede nie soos wat sy gehoop het nie.
Sy het alles gedoen om die Here tevrede te stel en Hom deur haar dade te wys dat sy Hom lief het en dien, maar nou ervaar sy dat Hy haar teleurgestel het. Hy het nie opgedaag toe sy Hom dringend in ’n lewe-en-dood situasie nodig gehad het nie.
Sy wonder: “Is Hy nog goed? Is ek nog geliefd? Hoekom het Hy nie gekom toe ek Hom nodig gehad het nie?”
Dit is juis in sulke krisisse dat ons ontdek waarop ons geloof gebou is.
Martha redeneer uit 'n plek van prestasie:
“Ek het my kant gebring. Ek het getrou gebly. Ek het Hom gedien. Daarom behoort Hy nou my kant te kies. Daarom behoort Hy nou Sy kant te bring.”
Maar wat sy – en ons – moet leer, is dat ons nie God se guns deur prestasie kan wen nie.
God se liefde kan nie deur ons prestasie verdien word nie, en dit word ook nie deur ons tekortkominge vernietig of verloor nie.
Martha het God se liefde gedeeltelik deur die lens van haar omstandighede en haar verwagtinge probeer verstaan.
Wanneer ons geloof op die proef gestel word, word dit blootgelê. Dan besef ons waarop ons geloof werklik gebou is.
Ons wonder dan saam met Martha:
“Is God nog goed, en is ek nog geliefd wanneer my omstandighede nie wys wat ek gehoop het nie?”
Martha se krisis konfronteer haar met ’n verstaan van God se liefde wat nie meer deur prestasie of omstandighede bevestig kon word nie.
Dit is hier waar ons ’n belangrike onderskeid moet tref tussen die onvoorwaardelike liefde van God wat ons red en die uitvloeisel van ons redding wat oorgaan in geloof in aksie.
God het ons onvoorwaardelik lief en red ons op grond van Sy genade en die voltooide werk van Jesus Christus. Voordat ons iets kan doen, het God reeds die eerste stap geneem. Ons hoef niks te bewys of te presteer om geliefd te wees of om Sy genade te verdien nie.
Dit is genade.
En wat gebeur nou?
Ons begin oorloop van daardie liefde.
Ons loop oor van dankbaarheid, liefde, hoop, geloof en goedgunstigheid, en ons begin uitkyk vir geleenthede om dit uit te leef en met ander te deel.
Was jy al ooit so oorweldig deur dankbaarheid vir jou redding dat jy sommer alles vir die Here wou gee? Jy sien, jou besef van God se groot genade en liefde vir jou spoel oor na dade.
Dit is nie dade om God se liefde te verdien nie, maar dade wat uit God se liefde voortvloei.
Dit is die uitvloeisel van die waarheid dat God ons eerste liefgehad het.
Geloof en liefde is onlosmaaklik aan mekaar gekoppel. God se liefde is die fondament wat geloof aktiveer. Wanneer ek hierdie liefde hoor, ontvang en glo, word my geloof geaktiveer en begin ek vanuit ’n plek van vrymoedigheid leef.
Ek hoef nie eers iets te doen om geliefd te wees nie. Ek leef en doen vanuit die wete dat ek reeds geliefd is.
Dit is geloof in aksie.
Lees:
Mediteer:
- Kan ek op ’n plek kom waar ek God dien en liefhet vir wie Hy is, eerder as om my geloof te bou op my omstandighede?
- Vergelyk ek God soms met mense en dink ek dat Hy my liefde of trou moet verdien?
- Is ek agterdogtig oor God wanneer dinge nie verloop soos ek verwag nie?
- Leef ek uit ’n behoefte om God se liefde te verdien, of leef ek vanuit die sekerheid dat ek reeds geliefd is?
Bid:
Vader, dankie vir U genade wat my red. Dankie dat my redding deur die bloed van Jesus Christus ’n afgehandelde saak is en dat ek met U versoen is. Dankie dat ek toegang tot U het en in ’n liefdesverhouding met U kan leef.
Dankie dat U my liefde en waarde nie meet aan my doen en late nie en dat ek nou uit geloof in U kan leef – vanuit wie U is en vanuit die sekerheid van hoe getrou U is.
Dat my geloof in U sigbaar word in my optrede. Dankie vir U Gees en U krag in my, waarop ek kan staatmaak, selfs wanneer ek foute maak.
Dat ek nie hoef te probeer presteer om U liefde te verdien nie, maar vanuit U liefde kan leef en dit deur my lewe sigbaar word.
Amen.
Bonus: Spreek Lewe!
God se liefde is nie ’n beloning vir my prestasie nie. Dit is ’n waarheid wat reeds bewys is. Ek leef my geloof uit omdat ek geliefd is!
Aanbidding:
Love of God – Brandon Lake, Phil Wickham
Dag 4: In wie?
Ons sien Martha se probleem was nie bloot dat sy te min geloof gehad het nie. Haar geloof moes verskuif van “wat ek vir Jesus doen” na “wie Jesus vir my is.”
Die persoonlike belewenis van ’n verhouding met Jesus Christus – van wie Hy persoonlik vir my is – is hier die kern.
Baie mense probeer oorleef op die geloof van ander gelowiges of bekende predikers. Ons kan maklik op iemand anders se geloof en geestelike ervaring staatmaak, totdat ons self gekonfronteer word met ’n oomblik waarin ons moet weet: Wie is Jesus vir my?
Elisa moes ook leer om nie net op Elia se teenwoordigheid en bediening staat te maak nie. Toe Elia weggeneem word, moes Elisa self vanuit sy verhouding met God leef.
Geloof moet jou eie persoonlike belewenis van Jesus word.
Daarmee saam is daar ’n ander uitdaging: baie Christene het geloof vir die toekoms, maar is wanhopig vir nou.
Martha antwoord Jesus vanuit ’n toekomstige geloof. Sy glo iets wat waar is – sy glo dat Lasarus op die laaste dag sal opstaan. Maar Jesus neem haar verder:
“Ek weet dat hy sal opstaan in die opstanding in die laaste dag. Jesus sê vir haar: Ek is die opstanding en die lewe; wie in My glo, sal lewe al het hy ook gesterwe; en elkeen wat lewe en in My glo, sal nooit sterwe tot in ewigheid nie. Glo jy dit?” (Joh. 11:24-26).
Jesus herhinner haar dat Hy nou die opstanding en die lewe is.
Ons kan maklik sê:
“Eendag....”
Maar Jesus sê:
“Ek is”.
Jesus sê nie: “Eendag sal Ek wees” nie.
Die vraag is dus nie net:
Glo ek dat God eendag alles gaan regmaak?
Die dieper vraag is:
Glo ek dat Jesus nou is wie Hy sê Hy is?
Jesus vra my om Hom te vertrou vir wie Hy nou is, nie net vir wat Hy eendag sal doen nie.
Wanneer hierdie waarheid my konfronteer en ek begin glo:
“EK IS – VANDAG,”
Jesus is nie net die antwoord vir my toekoms nie. Hy is my antwoord vandag.
Lees:
Mediteer:
- Glo ek dat Jesus vandag IS?
- Is die Here my Bron?
- Is die Here my Hoop vandag?
- Is die Here my Vreugde vandag?
- Is die Here my Sterkte vandag?
- Hoe wys my lewe dit?
- Wys my dade vandag dat ek geloof in die Here het?
Bid:
Here, ek erken dat ek soms, soos Martha, nie verstaan waaroor dit gaan nie. Ek het probeer en probeer, en U telkens bevraagteken wanneer U nie “vir my deurgekom het” soos ek verwag het nie.
Ek het my geloof op ander se geloof gebou. Soms selfs my geloof in geseënde mense gestel, eerder as in U.
Ek het na U gekyk deur die lens van werke, godsdiens en prestasie. Ek het U met ’n mens vergelyk.
Maar U is nie soos ’n mens nie. U is God. U gedagtes is ver bo enige mens se gedagtes – ver bo my eie gedagtes.
Vandag plaas ek my geloof in U.
In U liefde.
U liefde red. U liefde glo alles, hoop alles, verdra alles. U is liefde.
U is vandag.
U is nie net in my toekoms nie. U is hier en nou.
U IS!
Amen.
Bonus: Spreek Lewe!
Jesus is nie net my hoop vir eendag nie. God is my Bron, my Hoop, my Krag, my Vreugde, my God en my Lewe – vandag!
Aanbidding:
More Than Able – Elevation Worship
Dag 5: Ignited!
Wanneer jy ’n potjie beplan en al die bestanddele het, maar jy het nie ’n pot nie, bêre jy die bestanddele in die yskas en vergeet dalk daarvan. Die kos word op die ou einde sleg, want jy het nie ’n plek waar die bestanddele bymekaarkom om gaar te word nie.
Die pot is die plek.
Hierdie plek is jy self.
Jou eie lewe en hart is die plek waar die Woord en die Gees moet ontmoet. Dit is waar alles bymekaarkom om in ’n feesmaal omskep te word waarvan ander ook kan eet.
Jy het reeds die bestanddele ontvang. Jy is gered, jy is gedoop en jy het die Heilige Gees ontvang. Jy spandeer tyd in die Woord. Jy spandeer tyd in gebed en in aanbidding.
Die tyd het aangebreek om te besef:
Ek is die plek. Ek is die kerk. Ek is die Bruid. God kies om Sy Koninkryk deur my lewe te bevorder!
Die vertrekpunt van ons Christelike geloof is nie:
“Ek moet eers genoeg doen sodat God my kan liefhê.”
Dit is:
“Hy het my lief.”
“Want ek is versekerd dat geen dood of lewe of engele of owerhede of magte of teenwoordige of toekomende dinge of hoogte of diepte of enige ander skepsel ons sal kan skei van die liefde van God wat daar in Christus Jesus, onse Here, is nie” (Rom. 8:38-39).
God het my lief: diep, opreg en intens!
Wanneer ek begin glo dat ek werklik deur Hom geliefd is, word my geloof geaktiveer. Dan kan ek selfs in my krisis vertrou op wie Jesus is – nie net op wat Hy eendag sal doen nie – en begin ek vanuit Sy liefde vrymoedig leef met ’n lewe wat getuig.
Dit is nie ’n geloof in iets wat dalk waar kan wees nie. Die liefde van God is reeds bewys – in Jesus Christus, in die kruis, in die Evangelie en in die geskiedenis.
Die doel is dat hierdie waarheid so diep in ons lewens land dat ons geloof geaktiveer word, dat ons vrymoedig begin leef en dat ons uiteindelik iets van hierdie liefde deur ons eie lewens kan vertel.
Paulus verduidelik in Galasiërs, Filippense 3 en Romeine 8 dat ons geloof nie gaan oor ons eie prestasies of wetsonderhouding nie, maar oor ons nuwe lewe in Christus.
As jy broers of susters het, is jy bekend met sibling rivalry en die normaliteit daarvan. “Kenners” verduidelik dat dit selfs goed kan wees, omdat jy daardeur kommunikasievaardighede, probleemoplossing en die gesonde hantering van konflik aanleer.
Tog ontstel dit my geweldig wanneer my kinders lelik met mekaar is. Ek dink dan aan Kain, wat sy broer uiteindelik doodgeslaan het. Dit herinner my aan die sondige toestand van die mens – dit wat natuurlik en vleeslik in ons is.
Maar hierdie week staan ek in die kombuis en een van my kinders doen onverwags iets baie mooi vir my ander kind. In daardie oomblik word ek oorweldig – oorweldig deur die gebaar en deur die liefde wat ek tussen hulle sien.
En ek voel sommer self geliefd.
Ek voel as ouer geliefd omdat my kinders mekaar liefhet!
In daardie klein, maar oorweldigende oomblik kry ek ’n flikkering in my gemoed van hoe ons liefde vir mekaar ook iets weerspieël van hoe ons God liefhet.
Niks kan ons van die liefde van God skei nie.
Daarom is die opdrag dat ons mekaar moet liefhê soos Hy ons liefgehad het.
Die liefde wat ons van God ontvang, bly nie in ons opgesluit nie. Dit vloei deur ons na ander.
Die bestanddele kom bymekaar. Die pot word warm. Die geloof word geaktiveer. En die liefde word sigbaar.
Lees:
Mediteer:
- Hoe het God my eerste liefgehad?
- Het ek alles ontvang wat ek nodig het om my geloof uit te leef?
- Hoe leef ek hierdie liefde uit teenoor die mense rondom my?
- Waar kan my geloof vandag sigbaar word?
Bid:
Vader, dankie dat U alles vir my gegee het – die pot, die bestanddele en die hitte!
Dankie dat ek U liefde en U Gees ontvang het. Dankie vir die nuwe lewe wat ek in Christus ontvang het en dat ek deur geloof in U, in wie U vandag is, kan begin leef en vrug dra.
Dankie dat U my nie net liefhet nie, maar dat U my ook deel maak van wat U in hierdie wêreld doen.
U het my aangesteek met U liefde, en nou mag ek die mense rondom my aansteek met dieselfde liefde!
Amen.
Bonus: Spreek Lewe!
Ek glo nie net dat God liefdevol is nie; ek glo dat Hy my liefhet – diep, opreg en intens. Hy het alles gegee wat ek nodig het, en daarom leef ek hierdie liefde en geloof uit teenoor almal om my!
Aanbidding: