Genade en geregtigheid: God se bevrydingsmodel
Neville Goodchild
Dag 1: Die begin van geloof
Daar is woord oor jou lewe. Jy het dalk al daarmee kontak gemaak. Omdat ons nie noodwendig die werk van genade verstaan nie, sien ons nie altyd die vrug van die woord wat die Here vir ons gegee het nie. Soms dink ons selfs dat God nog wag vir iets voordat daardie woord in ons lewens geaktiveer sal word. Hierdie woord wat die Vader oor ons lewens uitgespreek het, is reeds geaktiveer by die kruis waaraan Jesus gesterf het: dit was die oomblik toe genade begin het en aan die wet voldoen is.
Om die aktivering van die woord oor ons lewens te beleef, moet ons genade verstaan. Om genade te verstaan, moet ons 'n diep oortuiging ontwikkel van Vader se liefde vir ons. Die begin van geloof is die vertroue dat Vader God jou onvoorwaardelik liefhet. Indien jy nie glo dat Vader jou liefhet nie, is dit onmoontlik om werklik oortuig te wees dat Hy jou ook vergewe het en jou sondes van jou verwyder het so ver soos die ooste van die weste verwyder is.
Wanneer ons oortuig raak van Vader se liefde vir ons, kan ons met geloof vertrou dat alles wat Vader deur die genadewerk van Jesus aan ons gee, reeds aan ons behoort. God hou nie die beloftes wat Hy vir jou gegee het vir ‘n bestemde tyd nie terug nie. Die bestemde tyd was die dag toe Jesus gesterf het. God se beloftes vir jou en die woord wat Hy oor jou lewe gespreek het, kan klaar in vervulling begin kom wanneer jy glo in sy onvoorwaardelike en onmeetbare liefde vir jou.
Lees:
Mediteer:
- Is daar woord wat jy by die Here ontvang het oor jou lewe, wat jy voel nog nie in vervulling gekom het nie?
- Is daar woord wat jy by die Here ontvang het oor jou geliefdes, waaroor jy voel jy dalk verkeerd gehoor het?
- Vra vir Vader om sy liefde aan jou te openbaar en jou geloof en vertroue in sy onvoorwaardelike liefde te versterk. Vat dan die woord wat jy glo Hy vir jou gegee het, en vertrou op Hom om dit te aktiveer.
- Ons gedagtewêreld kan ons vinnig begin oorheers as dit met negatiwiteite gevul word. Vat God se woord, spreek dit en herinner jouself daaraan. Veg teen die negatiewe gedagtes deur dit na Jesus toe te bring en dit met sy waarheid te belyn.
Bid:
Vader God, ek bely dat ek u liefde vir my nie ten volle verstaan nie. Openbaar u liefde vir my op 'n nuwe en vars manier. Ek kies ook om te glo dat U my liefhet en dat daar niks is wat tussen my en u liefde vir my kan kom nie! Dankie dat U voor die grondlegging van die aarde my reeds liefgehad het en my lewe beplan het. Here Jesus, dankie dat ek Vader se liefde deur U kan beleef en in 'n verhouding met Hom kan wees. Ek loof en prys u Heilige Naam, Jesus! Amen.
Bonus: Spreek Lewe!
“Want ek is versekerd dat geen dood of lewe of engele of owerhede of magte of teenwoordige of toekomende dinge of hoogte of diepte of enige ander skepsel ons sal kan skei van die liefde van God wat daar in Christus Jesus, onse Here, is nie.” - Romeine 8:38-39
Aanbidding:
River of Love & Everything - Cageless Birds (feat. Joel Case & Melissa Helser)
Dag 2: Geloof se getuienis
Om in die geregtigheid van God te staan en daaruit te kan lewe, moet ons oortuig wees van Vader se liefde vir ons. Oortuiging kan net gebeur deur geloof. Geloof kan net gekwalifiseer word deur die getuienis daaroor. In Romeine 10:17 leer Paulus vir ons dat geloof kom deur daarvan te hoor, en ons hoor dit deur na die woord van God te luister. Geloof kan net 'n uitwerking op ons lewens hê wanneer dit gehoor word, wanneer die getuienis daaroor vertel word.
As ons posisie van geregtigheid afhang van ons geloof, hoe groot moet ons geloof dan wees? Wanneer die lewe nie sin maak nie en omstandighede lyk asof dit nie verander nie, loop ons die risiko om weer te begin dink volgens die oordeel en wettiese sisteem waar ons na onself kyk en sê, “Dit is omdat my geloof nie sterk genoeg is nie nie. Ek moet groter geloof hê!” Deur dit te sê, neem ons weer die werk op onself in plaas van om Jesus se afgehandelde werk te ontvang.
Wat sterk geloof betref, sê Jesus dat al wat nodig is, is dat ons geloof so groot soos 'n mosterdsaad hoef te wees. Wat meer is: die Here het op grond van sy oortreffende liefde vir ons ook bepaal dat geloof nie uit onself opgewek hoef te word nie. Jesus is die skrywer en die finaliseerder van ons geloof. Deur Hom het ons begin glo, en deur Hom word ons geloof perfek gemaak. Jy hoef nie te struikel om geloof self te probeer opwek nie. Jesus se betrokkenheid en teenwoordigheid in jou lewe wek geloof op. Sy opdrag aan ons is om net ons oë op Hom gefokus te hou en daarmee saam gee Hy ook vir ons die belofte dat ons nie geestelik sal moeg raak nie.
Lees:
Mediteer:
- Jou getuienis, hoe groot of klein dit mag wees, is 'n middel waardeur geloof bevestig en gekwalifiseer word. Jou getuienis is kragtig om jou eie geloof, asook die geloof van ander te versterk.
- Vader God het deur sy goedheid ons tot bekering gelei. God is ryk in goedheid, verdraagsaamheid en geduld! Sê dit vir jou niks nie? Besef jy nie dat God jou deur sy goedheid tot bekering wil lei nie?
- Hoe gereeld probeer jy om jou eie geloof te versterk?
- Hoe gereeld gaan jy na Jesus toe en stel jy jou fokus op Hom om net in verhouding met Hom te wees en Hom toe te laat om geloof in jou hart op te wek?
Bid:
Vader God, U het vir my ‘n ongelooflike geskenk kom gee! Deur u goedheid is ek gered, en deur u Seun kan ek geloof hê in u ongelooflike liefde! Ek prys U daarvoor. Heilige Gees, help my om my oë op Jesus gerig te hou en om 'n diep oortuiging van Vader God se liefde in my hart te ontwikkel. Ek prys u Here Jesus, vir u deelname en die geloof wat U in my hart opwek! Amen.
Bonus: Spreek Lewe!
Met my oë gevestig op Jesus sal ek nooit geestelik moeg raak nie! Ek kan enige beproewinge deurstaan en deur die krag van die Heilige Gees end-uit volhard!
Aanbidding:
I Am Your Beloved & Running Home - Bethel Music (feat. Jonathan & Melissa Helser)
Dag 3: Die saad van twyfel
Die grootste risiko vir ons geestelike lewens is om ons geloof in die Here te verloor. Die vertrekpunt van ons geloof is ons geloof in Vader God se liefde vir ons. Daarom fokus die meeste leuens wat oor ons of vir ons gesê word ook op ons geloof. In ons eie gedagtes is ons twyfel oor Vader se liefde vir ons ook een van die grootste struikelblokke wat ons moet te bowe kom.
Die saad wat hierdie twyfel kweek, is 'n mond waaruit genade so wel as oordeel uitkom. Wanneer genade en oordeel gelyktydig gepreek of gespreek word, ontstaan daar twyfel oor Vader God se goedheid en liefde vir ons. Oordeel sluit aan by die wet. Dalk wonder jy oor die volgende stellings: As ons dan gedurig genade preek, hoe sal ons dan heilig word sonder om die wet te preek? Hoe gaan sondaars verander as daar nie ook veroordeling op grond van die wet is nie?”
Jesus het 'n nuwe bedeling aangekondig. Hy het die vereistes van die wet kom vervul en Hy het die tyd van genade kom aankondig. Die wet is volbring en die tyd daarvoor is verby. God gaan nie terug na dit wat Hy klaar afgehandel het nie. Hy is besig om nuwe dinge te doen en nuwe paaie te maak. Om aan te sluit by die wat die Heilige Gees besig is om te sê, moet ons ophou om oor die wet te praat en om dit steeds deel van ons geloof te maak.
Hoe dan sal ons heilig word? Genade is gegee om ons heel en heilig te maak. Genade se werk is nie slegs om te vergewe nie. Die volle uitwerking van genade bevry ons van sonde. Die enigste manier om daardie bevryding te ontvang, is om van oordeel ontslae te raak. Jesus wys vir ons verskeie voorbeelde van mense wat deur oordeel bedreig en amper doodgemaak is en wat deur genade van sonde bevry is. Deur te glo dat genade die enigste antwoord vir heiligmaking en geregtigheid is, verwyder ons een van die sterkste bronne van twyfel oor God se liefde uit ons lewens.
Lees:
Mediteer:
- Meng jy nog steeds die begrippe oor genade en die wet wanneer jy nadink waaroor geloof gaan?
- Wanneer jy jou geloof met ander mense deel, speel genade en oordeel nog steeds 'n rol in dit wat jy met hulle deel?
- Om die goeie nuus van Jesus met mense te kan deel en die liefde van Vader God te kan oordra, moet daar geen oordeel meer uit ons monde kom nie.
Bid:
Vader God, kom verander my perspektiewe oor geloof. Leer my dat dit alles gaan oor u liefde en genade, en dat oordeel nie meer van toepassing is nie. U woord sê dat dit U is wat mag oordeel en dat ons dit aan U moet oorgee. Here Jesus, leer my om lief te hê soos U en geen veroordeling teenoor ander mense uit te spreek nie. Dankie dat U my liefhet en dat U my nie meer oordeel nie. Ek prys u Heilige Naam, Here Jesus! Amen.
Bonus: Spreek Lewe!
Daar is nou geen meer veroordeling vir hulle wat in Jesus Christus is nie!
Aanbidding:
For the Cross - Bethel Music (feat. Brian & Jenn Johnson)
Dag 4: Geloof wat prakties gemaak word
Om in die volheid te lewe van dit wat Vader vir ons kom gee het, moet ons glo in sy liefde vir ons. Hoe kan ons op praktiese maniere ons geloof en vertroue in Vader God plaas? Dit begin deur te verstaan dat Jesus nie gekom het vir mense wat perfek is nie. Gedurende sy tyd op aarde is Hy 'n vriend van sondaars genoem. Hiermee wou mense 'n negatiewe konnotasie aan Jesus gee, maar dit het eerder sy hart aan ons geopenbaar.
Jesus het nie gekom vir diegene wat sonder sonde is nie. In elk geval leer Paulus vir ons in Romeine 3:23 dat daar geen mens behalwe Jesus is wat nie gesondig het nie. Almal het ontbreek aan die heerlikheid van God. Jesus het vir die sondaars gekom. Dit sluit in die mense wat moedswillig sondig, mense wat weens hulle sonde verwerp is, mense wat per ongeluk sondig en selfs mense wat gedink het hulle doen dinge beter as Jesus (soos Nikodemus). Jesus het gekom vir jou. Hy het uit sy oorvloedige liefde gekom om jou vry te maak en vir jou vergifnis en bevryding van sonde te kom gee.
Om ons eie harte te oortuig van daardie genade en liefde, moet ons:
- Glo dat Vader God ons onvoorwaardelik vergewe en ons sonde van ons verwyder wanneer ons ons sonde bely.
- Onself vergewe. Soms is dit maklik om te vra vir vergifnis by God, maar ons verwerp of oordeel onsself nog steeds. Ons kan nie Vader se liefde en genade ontvang nie, want ons eie oordeel verhoed die ontvangs daarvan. As Vader God ons kan vergewe, dan kan ons onself vergewe!
- Onself noem wat Vader ons noem. Begin jouself te sien met God se oë. As jy nog nie kan nie, gaan lees God se woord en neem kennis van dit wat Vader van jou sê. Vra die Heilige Gees om jou te lei en aan jou die persoonlike woord van Vader God te openbaar.
Lees:
Mediteer:
- As Vader jou kan en wil vergewe, watter rede het jy om nie jouself te vergewe nie?
- Kan jou sonde God se woord oor jou lewe verwyder?
- Geen sonde kan die woord van God oor jou lewe verwyder nie. Ongehoorsaamheid en ongeloof kan ons verhoed om die vrug daarvan te beleef, maar God se woord bly die sterkste waarheid oor jou lewe en dit sal vir ewig wees. Ons moet net sy woord ontvang en saam met Hom begin om dit oor ons lewens te spreek.
- Enige woord wat jy gehoor het of beleef het wat jou nie meer oortuig van Vader se liefde en goedheid nie, is nie van God af nie.
- Maak 'n oefening daarvan om deur die boek van Efésiërs te lees en elke naam wat vir jou as gelowige gegee word te vat en neer te skryf. Gebruik daardie name en spreek dit oor jou eie lewe uit sodat jy meer en meer daarvan oortuig kan word.
Bid:
Vader God, dankie dat U my liefhet. Ek kies om te glo dat U my onvoorwaardelik vergewe wanneer ek my sonde aan U bely. Omdat U my onvoorwaardelik kan vergewe, kom vergewe ek ook myself. Here Jesus, help my om u liefde voortdurend te sien sodat ek myself ook kan genadig wees, want genade is die enigste bevrydingsmodel wat U nou gebruik. Heilige Gees, lei my in God se woord en openbaar sy woorde van liefde aan my. Ek prys u Heilige Naam, Here Jesus! Amen.
Bonus: Spreek Lewe!
Die Here het reeds van die begin af ongelooflike planne vir my lewe gehad. Sy woord sal nie ledig terugkeer nie!
Aanbidding:
Who You Say I Am - Hillsong Worship
Dag 5: Genade vir ander, verander
Ons geregtigheid kom net van genade af en die genade begin net deur die geloof in Jesus, wat geaktiveer word deur liefde (Galasiërs 5:5-6). As daardie genade dus so 'n uitwerking op ons lewens het en vir ons al hierdie geskenke en verlossing van sonde in ons lewens gee, behoort dit dan uit ons oor te vloei na ander mense toe.
As ons na die wêreld en die mense om ons kyk en beoordeel met die verwagting dat dit hulle lewens gaan verander, gaan ons ontdek dat daardie mense baie weerstand bied. In somige gevalle veroorsaak die gelowiges wat mense met oordeel hanteer dat daardie mense 'n afkeer teenoor Christene ontwikkel. Jesus het vir ons kom wys dat daar net een manier is wat ons lewens kan verander. Deur sy genade en sy liefde is ons getransformeer. As ons verandering in die mense om ons wil sien, het Jesus vir ons net een metode gegee – dat ons genade vir hulle moet hê.
Hoeveel is te veel genade? Jesus gee vir ons die standaard van Vader God. In Matthéüs 18:22 sê Jesus vir Petrus dat ons sewentig maal sewe keer moet vergewe. Aangesien ons ook in Jeremiah se klaagliedere hoor dat die Here se genade elke môre nuut is, sê dit vir ons dat daardie sewentig maal sewe vir elke dag geld.
Hoe kan ons mense oortuig van die genade wat Jesus vir hulle het? Om genade te ontvang, moet ons glo in Vader se liefde vir ons. So ook, as ons wil hê mense moet begin glo in die genade van God, moet ons vir hulle begin liefwees en liefde bewys. Slegs deur in Vader se liefde vir hulle glo, kan hulle teen volle in sy vergifnis en sy genade glo. So begin hulle lewens verander en begin hulle ook in die geregtigheid van God staan.
Die transformasie van ander mense se lewens word 'n getuienis. Die getuienis het krag om ons geloof te versterk. Geloof word gekwalifiseer deur getuienis daaroor. Wanneer ons geloof versterk word, verander ons lewens meer en raak ons harte meer soos Jesus se hart. Die groei in ons eie lewens lei na meer liefde vir ander mense, meer lewens wat gered word, meer transformasie, meer getuienis en meer geloof. Dit word die kringloop van oortreffende vermenigvuldiging van God se goedheid in ons lewens en die uitbreiding van sy Koninkryk in hierdie wêreld.
Lees:
Mediteer:
- Is daar enige mense om jou wat jy graag sal wil sien gered moet word?
- Wat is jou benadering teenoor hulle? Probeer jy vir hulle wys hoe verkeerd hulle is, of benader jy hulle met liefde wat onvoorwaardelik vergewe en genade wys?
Bid:
Vader God, U kom verander my lewe deur die liefde wat U vir my het. Ek prys U daarvoor! Help my om die genade en liefde wat U vir my wys ook te wys aan die mense om my. Laat ek die volheid van u liefde begin verstaan en daarvan oortuig raak, sodat ek kan oorvloei daarvan en dat die oorvloed die mense om my se lewens kan begin bereik. Here Jesus, kom werk deur my om redding te bring in ander mense se lewens. Ek prys u Heilige Naam, Here Jesus! Amen.
Bonus: Spreek Lewe!
Liefde en genade vir ander mense verander hulle lewens, wat weer my geestelike groei bevorder sodat meer mense verander kan word deur Jesus wat deur my vloei!
Aanbidding:
Your Love Change Everything - United Pursuit (feat. Brock Human)