Die Gees ... Lei
Heinrich Dry
Dag 1: Soos ʼn wind wat waai ...
Kinders van die Here word gelei deur die Heilige Gees. Dit gee momentum aan hulle lewens en aksies. Die Gees is onsigbaar, ons kan Hom nie fisies waarneem nie, maar Hy is ook sigbaar, soos die wind. Klik asseblief op vandag se opskrif wat in blou gemerk is. Dit gaan U na Joh. 3:8 toe vat.
Ons lees oor die jong kerk in Handelinge ...
Handelinge 15:22-28 (AFR53): "Toe het die apostels en die ouderlinge saam met die hele gemeente besluit om manne uit hulle te kies en na Antiochíë te stuur saam met Paulus en Bárnabas, naamlik Judas, met die bynaam van Bársabas, en Silas, manne wat voorgangers onder die broeders was. En hulle het deur hul bemiddeling dít geskrywe: Die apostels en die ouderlinge en die broeders aan die broeders uit die heidene in Antiochíë en Sírië en Cilícië: Groete! Aangesien ons gehoor het dat sommige wat van ons uitgegaan het, aan wie ons geen opdrag gegee het nie, julle met woorde ontstel en julle gemoedere verontrus deur te sê dat julle besny moet word en die wet moet onderhou, het ons eenparig besluit om manne te kies en na julle te stuur saam met ons geliefde Bárnabas en Paulus — manne wat hulle lewe oorgegee het vir die Naam van onse Here Jesus Christus. Ons het dan Judas en Silas afgevaardig om ook mondeling dieselfde berig te bring. Want die Heilige Gees en ons het besluit om verder geen las op julle te lê nie as hierdie noodsaaklike dinge: dat julle jul onthou van afgodsoffers en van bloed en van wat verwurg is en van hoerery. As julle jul hiervan onthou, sal julle goed doen. Vaarwel!.'"
Dit is duidelik uit bostaande teks dat die jong kerk in Handelinge ʼn opregte, ernstige pad met die Heilige Gees loop. “want die HEILIGE GEES EN ONS HET BESLUIT ...”
In die vroeë kerk (soos in Handelinge vervat) was die gelowiges bekend as die "mense van die weg." Hierdie titel verwys nie net na ’n oortuiging nie, maar na die handelinge – die aktiwiteite en die momentum van die kerk. Om deur die Gees gelei te word, beteken om in beweging te wees. Smith Wigglesworth het dit radikaal gestel: "If you are at the same place that you were yesterday, you’ve backslidden." As daar nie groei of energie is nie, is daar gevaar van agteruitgang.
Die Griekse woord vir "besluit" in vers 28 is dokas. Dit beteken letterlik "hulle het tot ’n opinie gekom." Dit is die misterie van die Gees se leiding: Hy dwing ons nie soos slawe nie, maar Hy lei ons om Sy opinie ons eie te maak. Wanneer ons in lyn met Sy hart kom, kan ons met vrymoedigheid sê: "Die Heilige Gees en ons het besluit." Sien jouself soos ’n seilboot op die see. Jy kan die wind nie sien nie, maar jy sien die momentum in die seile. Die Gees is daardie wind wat rigting en goddelike energie gee aan elke keuse wat ons maak.
Lees: Handelinge 15
Mediteer: Is ek op die plek in my geestelike lewe waar ek saam met die Heilige Gees besluit oor die pad vorentoe?
BID: Heilige Gees, ek weier om vandag op dieselfde plek te staan as gister. Dankie vir die momentum wat U in my lewe bring. Gee my die vrymoedigheid om besluite te neem wat in lyn is met U opinie, sodat ek saam met U kan beweeg. Amen.
SPREEK LEWE!: Ek kan vandag een spesifieke besluit waaroor ek tob, vat en in plaas daarvan om bloot my eie logika te gebruik, vra: "Heilige Gees, wat is U opinie hieroor?"
AANBIDDING: This is Amazing Grace - Phil Wickham
Dag 2: Vader se Hart
Ek dink tóg dat die Here ons iets van die omvang van Sy liefde laat verstaan wanneer ons ons eie kinders het. Dit is so maklik om jou eie kinders lief te hê, lekker om hulle te versorg en wanneer hulle tieners word en tog so slim is, lekker gesprekke met hulle te voer. Dis dan wanneer baie van hulle regtigwaar hulle humorsin ontwikkel en met die lekkerste kwinkslae vorendag kom.
God voel so oor ons. Meer nog. Al kan ons dit nie ten volle verstaan nie en al het ons die wete van ons eie onvolmaaktheid wat ons soms laat voel asof ons nie goed genoeg is vir sy liefde nie, kan ons staatmaak op Sy woorde aan die dissipels soos in Johannes 16:5-15 (TLB). Jesus weet dat die dissipels hartseer is omdat Hy terug na die Vader toe gaan. Dink net hoe gemaklik was hulle. Hier is hulle die heeltyd saam met iemand wat mense uit die dood opwek, op water loop, visser vermeerder. Dit moes vir die dissipels onmoontlik geklink het: hoe kon dit tot hulle "voordeel" wees dat Jesus weggaan? Maar Jesus het ’n groter verborgenheid geken. Hy was fisies by hulle, maar die Heilige Gees sou binne-in hulle kom woon. Jy is nou die instrument en die tempel van die Allerhoogste.
Die Heilige Gees se doel in die Drie-eenheid is om te troos, te leer, te bekragtig, maar meer nog, om die wil en die hart van die Vader aan ons te openbaar. Hy is die Goddelike Vertolker wat die diep gedagtes van God neem en dit in ons binneste kom "deponeer." Hy leer ons nie net reëls nie; Hy leer ons die hartklop van ’n Vader wat ons liefhet. Die Heilige Gees is deel van ons groei in geloof, help ons om momentum in ons geestelike lewe op te bou wat sal reflekteer in ons daaglikse bestaan.
Liewe leser, soos u nou sit en lees is die Gees in jou. Jy en die Gees het saam besluit om hierdie dagstuk te lees en daaroor te mediteer. Wat ʼn wonderlike gedagte. Die Gees is in ons, deel van ons, vir ons en skep nuwe momentum saam met ons.
LEES: Joh. 14
BID: Heilige Gees, ek eer U as my Vertrooster en Leermeester. Dankie dat U my nie net die pad wys nie, maar dat U my die Vader se hart wys. Help my om vandag as U tempel te leef. Amen.
MEDITEER: In watter aspekte van my lewe is ek dalk minder “Geesbewus” en meer wêreldbewus?
SPREEK LEWE!: Ek hoor die sagte getuienis van die Gees in my hart.
AANBIDDING: Great are You, Lord – All Sons & Daughters
Dag 3: My identiteit in God
In Kol. 1:26-29 (The Message) staan: “26-29 This mystery has been kept in the dark for a long time, but now it’s out in the open. God wanted everyone, not just Jews, to know this rich and glorious secret inside and out, regardless of their background, regardless of their religious standing. The mystery in a nutshell is just this: Christ is in you, so therefore you can look forward to sharing in God’s glory. It’s that simple. That is the substance of our Message. We preach Christ, warning people not to add to the Message. We teach in a spirit of profound common sense so that we can bring each person to maturity. To be mature is to be basic. Christ! No more, no less. That’s what I’m working so hard at day after day, year after year, doing my best with the energy God so generously gives me.”
Bostaande is ʼn pragtige vertaling. In ʼn neutedop: Christus is in ons. Geen tierlantyntjies of goed wat ons hoef te doen nie. Die “basics”. God in ons. Die Heilige Gees lei ons om ons identiteit in Hom uit te werk. In die boek Efesiërs ontsluit Paulus ’n goddelike volgorde wat ons nie mag omdraai nie: Sit, Loop, Staan. Die lewe in die Gees begin altyd by "Sit" – dit is die verstaan van jou identiteit en om te rus in wat klaar vir jou gedoen is. Eers wanneer jy jou posisie in Christus verstaan, kan jy "Loop" (jou skeppingsdoel uitleef) en uiteindelik met outoriteit "Staan" teen die vyand.
(Sit): Efesiërs 1:3-4: "Geseënd is die God en Vader van onse Here Jesus Christus, wat ons geseën het met alle geestelike seëninge in die hemelse plekke in Christus, soos Hy ons in Hom uitverkies het voor die grondlegging van die wêreld..." (Loop): Efesiërs 4:1: "Ek... vermaan julle dan om te wandel waardig die roeping waarmee julle geroep is." (Staan): Efesiërs 6:11: "Trek die volle wapenrusting van God aan, sodat julle kan standhou teen die liste van die duiwel."
Hier is die sleutel: Jesus is nie net ’n voorbeeld vir ons nie; Hy is ’n voorbeeld van ons. Hy is die bloudruk van hoe ’n mens lyk wat in volmaakte eenheid met die Vader wandel. Hou op om te "probeer" om soos Jesus te wees en begin toelaat dat Hy in jou leef. Identiteit is nie iets wat jy verdien nie; dit is ’n innerlike openbaring wat die Gees aan jou gee terwyl jy in Sy teenwoordigheid "sit."
LEES: Psalm 23:1-2
BID: Vader, openbaar aan my die diepte van my kindskap. Help my om op te hou probeer en te begin rus in wie Jesus in my is. Laat my identiteit die bron wees waaruit my dade vloei. Amen.
MEDITEER: Wat beteken dit vir my lewe “daar buite” nou dat ek weet wie ek is?
SPREEK LEWE!: Ek sit saam met Christus in die hemelse plekke. Ek is reeds wie Hy sê ek is.
AANBIDDING: Who You say I am - Hillsong
Dag 4: Van die Lelike Eendjie, Kalkoene, Arende en Rustige Water
Psalm 23:2 (Afr 53) sê:” Hy laat my neerlê in groen weivelde; na waters waar rus is, lei Hy my heen.” Lees ook 2 Kor. 3:17-18.
Wanneer die Herder ons na "waters van rus" lei, lei Hy ons na ’n spieël. Stilstaande water gee ’n perfekte refleksie van die realiteit. Die wêreld probeer ons oortuig dat ons soos die Lelike Eendjie is – vaal en onbelangrik, selfs lelik. Maar ons is nie. Ons is ook nie kalkoene wat skrop in die grond nie. In die water van die Gees sien ons die waarheid: ons is arende. Daar is ’n fabelagtige verhaal van arende wat tussen kalkoene grootgeword het; hulle het probeer skrop en probeer koel-koel, totdat hulle die eggo van ’n arendskreet in die lug gehoor het. Daardie eggo het iets in hulle hart laat resoneer – ’n herinnering aan hulle ware skeppingsdoel.
Die Here is die Gees, en waar die Gees van die Here is, daar is vryheid.
Transformasie gebeur "van heerlikheid tot heerlikheid." Die Griekse woord vir heerlikheid is doxa, wat ook "opinie" beteken. Ware verandering vind plaas wanneer God se opinie oor ons, ons eie opinie word. Die Heilige Gees lei ons om die oorspronklike bloudruk van ons lewe in Christus te ontdek. Soos die "lelike eendjie" wat in die water kyk en besef hy was nog altyd ’n swaan, so ontdek ons dat ons identiteit nooit verander het nie – ons was net verlore in ons eie gedagtes.
LEES: 2 Kor. 3
BID: Vader, vernuwe my denke vandag sodat U opinie van my die enigste een is wat saak maak. Laat die eggo van U waarheid in my hart resoneer totdat ek my vlerke oopspan. Amen.
SPREEK LEWE!: Ek is nie ʼn kalkoen nie, maar ʼn arend.
AANBIDDING: Goodness of God – John Ingram
Dag 5: Kom ons raak prakties
Kom ons wees eerlik met mekaar. Ons almal het ʼn Skeidsregter nodig in ons lewens. Daardie Stem wat jou keer voor ʼn woede uitbarsting, die Fluistering wat ons keuses beïnvloed, die gevoel van Vrede wanneer ons die regte besluite neem, al dit kom van die Heilige Gees in ons.
Die Heilige Gees lei ons prakties deur deure oop en toe te maak. Lees hier in Hand. 16:6-7 hoe die Heilige Gees deure toe maak.
Hoeveel van julle het al ʼn elektroniese toestel opgestel sonder om die handboek te lees en op geëindig in frustrasie? Die meeste van ons. Dit is omdat ons nie lees nie. Dieselfde geld die Bybel. In 2 Tim. 3:16-17 sien ons ook dat die Woord ons Handboek is. Rigtingwyser.
Derdens lei die Heilige Gees ons deur innerlike vrede. Lees Kol. 3:15-16. Vrede wat in ons harte heers. Die woord “heers” in Grieks is brabeuo en beteken om skeidsregter te wees. Hy gee ons vrede in ons harte, letterlik. Vrede sal in ons harte heers.
Bostaande is noodsaaklike inligting vir elke gelowige. Dit is hoe ons oorleef en hoe ons ons pad in hierdie wêreld navigeer.
LEES: 2 Tim. 3
MEDITEER: Watter saak kan ek nou dadelik voor die Gees bring in gebed, vir leiding?
BID: Heilige Gees, maak my ore sensitief vir U melodie. Help my om die deure wat U toemaak te vertrou, en met vrymoedigheid deur die deure te stap wat U oopmaak. Ek kies U ritme bo die geraas van die wêreld. Amen.
SPREEK LEWE!: Vandag gaan ek die "gym-musiek" van die wêreld verdoof. Ek gaan vyf minute van absolute stilte inbou om bloot na God se ritme te luister te midde van my besige dag.
AANBIDDING: Lead me Lord – Chris Stapleton