Jou Geloof is Sterk, Diep en Standvastig
Dag 1: Jou Geloof Is Reeds Genoeg
Hi, Gelowige, hoeveel glo jy op die skaal van geloof? Uit tien. Is jy by drie of vier? Sewe?
Baie van ons leef met die idee dat geloof op 'n skaal gemeet word. Daarom dink ons God wag dat ons geloof eers sterk genoeg moet word voordat Hy in ons lewe sal werk.
Maar dit is nie hoe Jesus werk nie.
Wanneer ons die Evangelies lees, sien ons die waarheid: oral waar mense na Jesus gekom het vir hulp, was hulle geloof genoeg. Sommige het groot geloof gehad, ander twyfelende geloof, en sommige het skaars geweet wie Hy is. Tog het Jesus nooit iemand weggestuur omdat hulle geloof "te klein" was nie. Die fokus was nooit op die grootte van hulle geloof nie, maar op die Een in wie hulle hul vertroue geplaas het.
Nog voordat ons vandag bewus raak van God se teenwoordigheid, is Hy reeds besig om in ons lewens te werk. God se plan vir ons begin nie wanneer ons begin glo nie; ons geloof begin wanneer ons bewus raak van sy werk. Ons begin om God se hand herken wanneer ons oë vir sy goedheid oopgaan. Die probleem is dikwels nie dat God afwesig is nie, maar dat ons Hom nie raaksien nie.
Jesus vergelyk geloof met 'n mosterdsaadjie. Dit gaan nie daaroor dat klein geloof op een of ander manier "magies" sterk genoeg is nie. Dit gaan daaroor dat enige geloof wat op Christus gerig is, genoeg is. Selfs die kleinste daad van vertroue ons groot Verlosser ontsluit sy genade.
Ons hoef dus nie vandag ons geloof te meet of met iemand anders s'n te vergelyk nie. Ons hoef nie God te beïndruk of ons geestelike prestasie te bewys nie. Hy nooi ons eenvoudig om ons oë op Hom te rig. Hoe helderder ons Jesus sien, hoe natuurliker groei ons geloof. Geloof begin nie by inspanning nie; dit begin by openbaring.
LEES: Matteus 17:20; Matteus 9:2
MEDITEER: Waar probeer ek steeds my geloof meet aan my eie prestasie, eerder as om my vertroue op Jesus alleen te plaas?
BID: Here Jesus, dankie dat U my nie beoordeel of veroordeel volgens hoe sterk ek dink my geloof is nie. Dankie dat U my nooi om my oë op U te rig. Help my om U hand raak te sien in my lewe en om met vrymoedigheid op U te vertrou. Ek kies vandag om nie my geloof te meet nie, maar om U te te soek. Amen.
BONUS: SPREEK LEWE!
Ek rig my oë op Jesus, en Hy voltooi die werk wat Hy reeds in my begin het.
AANBIDDING:
Oceans (Where Feet May Fail) – Hillsong United
Dag 2: Die Keuse om Net Op te Daag
Baie van ons dink geloof vereis buitengewone inspanning, dat net sekere mense sterk geloof kan hê. Ons probeer harder bid, harder glo en harder vertrou, asof God wag vir ons om 'n sekere geestelike vlak te bereik voordat Hy sal ingryp. Die Nuwe Testament is egter deurspek met voorbeelde wat presies die teenoorgestelde feit uitlig.
In Mattheus 9 bring ‘n groep mans ‘n verlamde man na Jesus toe. Hy kon nie loop nie, nie sy situasie verander nie en nie sy eie genesing verdien nie. Al wat gebeur het, was dat sy vriende hom binne Jesus se sigveld gebring het. Die oomblik toe Jesus hom sien, verander die hele verhaal. Voordat daar genesing was, was daar 'n ontmoeting. Voordat daar 'n wonderwerk was, was daar die nabyheid van Jesus.
Dit is die hart van "binne sig" wees. God wag nie vir volmaakte mense nie; Hy nooi beskikbare mense. Hy vra nie dat jy eers jou lewe moet uitsorteer voordat jy na Hom kom nie. Hy nooi jou om met jou vrese, vrae, mislukkings en hoop voor Hom te verskyn. Sy genade ontmoet jou nie nadat jy sterk geword het nie; sy genade is juis wat jou sterk maak.
Dikwels bly ons weg omdat ons voel ons geloof is te swak, ons gebede te gebroke of ons verlede te swaar. Maar Jesus het nog nooit iemand weggejaag wat na Hom toe gekom het nie. Die vrou met die bloedvloeiing het net aan sy kleed geraak (vandag se leesstuk). Die blinde man het net uitgeroep toe hy hoor dat Jesus verbygaan. Die verlamde man waarvan ons hierbo gelees het, is gedra. Almal het een ding in gemeen gehad: hulle het binne Jesus se sig gekom. Hulle het Jesus opgesoek.
Miskien is dit al wat God vandag van jou vra: kom net. Sit stil in sy teenwoordigheid. Maak jou Bybel oop. Bid al voel jou woorde onvolmaak. Sing al voel jou hart swaar. Daag net op. Wanneer jy kies om jouself in sy teenwoordigheid te plaas, doen Hy die werk wat net Hy kan doen.
LEES: Markus 10:46-52; Matteus 9:20–22
MEDITEER: Is daar 'n area van my lewe waar ek wegskram van God omdat ek dink ek moet eers sterker, beter of meer "geestelik" wees?
BID: Here Jesus, dankie dat U my nie vra om eers volmaak te wees voordat ek na U toe kom nie. Vandag kies ek om eenvoudig op te daag. Ek bring my hele lewe, my vreugdes en my gebrokenheid binne U teenwoordigheid. Dankie dat U my sien, my ken en my met genade ontmoet. Amen.
BONUS: SPREEK LEWE!
Ek kies om op te daag. Ek leef binne die sig van Jesus, en sy teenwoordigheid verander my lewe.
AANBIDDING:
Trust in God – Chris Brown and Isaiah Templeton
Dag 3: Aktiewe Geloof
Ware geloof is baie meer as bloot 'n oortuiging in ons gedagtes. Geloof is lewendig. Dit is soos 'n saad wat reeds die DNA van lewe in hom dra, maar wat eers begin groei wanneer dit in die regte omgewing geplant en natgemaak word. So is dit ook met geloof. God plant sy waarheid in ons harte, maar Hy bedoel nooit dat dit onaktief moet bly nie. Geloof wil ontkiem, groei en vrug dra.
Ware geloof gee uitvoering aan dit wat dit ontdek. Elke keer wanneer God Homself aan ons openbaar, word ons genooi om daarop te reageer. Die woord actualize beteken om iets 'n werklikheid te maak. Wanneer God se waarheid ons harte raak, word dit sigbaar in die manier waarop ons leef, die aksies wat ons neem. Ons probeer nie deur ons dade geloof bewys nie; ons dade word die natuurlike vrug van wat ons reeds oor God ontdek het. In Handelinge (Acts) is baie wonderwerke rapporteer wat deur die apostels gedoen is. Hulle kon optree (act) omdat hulle reeds die opgestane Christus geken het. Petrus het nie die kreupel man genees omdat hy buitengewone selfvertroue gehad het nie. Hy het gehandel vanuit die openbaring van wie Jesus is. Sy geloof het uitvoering gegee aan wat hy reeds besef het.
Aanbidding is die omgewing waarin hierdie ontdekking plaasvind. Wanneer ons God aanbid, verskuif ons fokus van onsself na Hom. Ons begin sy goedheid, sy getrouheid en sy grootheid helderder sien. Soos reën droë grond nat maak sodat saak kan ontkiem, bring sy teenwoordigheid die geloof wat Hy reeds in ons geplant het, tot lewe. Daarom is aanbidding nie bloot sang en gebed nie; dit is die plek waar ons visie verander, waar ons geloof wortel skiet en waar ons harte voorberei word om gehoorsaam te leef.
Vra jouself vandag: Wat het God onlangs vir my gewys? Watter waarheid het ek ontdek wat nou gehoorsaamheid vra? Geloof word nie gemeet aan hoeveel ek weet nie, maar aan hoeveel ek bereid is om uit te leef van dit wat God reeds aan my openbaar het.
LEES: Handelinge 3:1–10; Psalm 84:4–7;
MEDITEER: Watter waarheid oor God het ek onlangs ontdek wat vandag 'n praktiese reaksie van my vra?
BID: Vader, dankie dat U Uself aan my openbaar. Dankie vir elke oomblik waarin ek U beter leer ken. Help my om nie net 'n hoorder van U Woord te wees nie, maar 'n doener daarvan. Laat my geloof vandag sigbaar word deur gehoorsaamheid, liefde en vertroue. Amen.
BONUS: SPREEK LEWE!
My geloof leef, groei en dra vrug. Ek gee uitvoering aan elke waarheid wat God aan my openbaar.
AANBIDDING:
What A Beautiful Name – Hillsong Worship
Dag 4: Insigte oor Sig
Dié van ons wat bril dra weet hoe irriterend dit is as daar ‘n vuil kol op die lens is wat jou sig verdof. Op skool het ons baie keer lipbalsem (lip-ice) op iemand se brilglase gesmeer as hulle dit iewers neergesit het. Natuurlik was die arme brildraer ontstoke en moes baie sukkel om weer die lense skoon te kry. Soms lyk dit of ons sommer self ons eie sig saboteur, sommer self die buisie gebruik en ons bril besmeer.
Ons sê dikwels dat ons wens vir sterker geloof. Maar wat as die probleem nie jou geloof is nie? Wat as jou grootste uitdaging eintlik is dat jou visie op Christus mettertyd bewolk geraak het?
Die vyand se doel is selde om jou geloof direk te vernietig. Hy probeer eerder jou aandag verdeel. Hy vul jou gedagtes met bekommernisse, teleurstellings, onsekerheid, menings, programme, sosiale media opinies en die geraas van die wêreld. Stadig maar seker begin ons meer na ons probleme kyk as na Jesus. Wanneer ons fokus versplinter, voel dit asof ons geloof al hoe swakker word. Tog is die oplossing nie om harder te probeer glo nie, maar om net weer ons oë op Christus te rig.
Die Bybel sê: "Laat ons die oog gevestig hou op Jesus, die Leidsman en Voleinder van die geloof" (Hebreërs 12:1-2). Let op: Jesus gee nie net geloof nie; Hy voltooi dit ook. Geloof groei wanneer ons Hom aanskou. Hoe helderder ons Jesus sien, hoe kleiner word ons vrese en hoe groter word ons vertroue.
Neville het genoem van 'n Marlothii-aalwyn uit sy tuin wat op die komposhoop beland het, op die oog af, heeltemal dood. Tóg, na ‘n paar weke kon hy nuwe blare sien vorm en het hulle dit weer uitgeplant. Vandag floreer die aalwyne in sy tuin. Die plant het nie nuwe lewe ontvang nie; die lewe wat reeds daarin was, het eenvoudig weer begin floreer.
So werk dit ook met ons geloof. Soms voel ons geestelik droog en moedeloos. Ons dink ons geloof het verdwyn, terwyl dit eintlik net buite die habitat is waarin dit bedoel was om te leef. Wanneer ons terugkeer na God se teenwoordigheid, sy Woord en die gemeenskap van gelowiges, word ons visie herstel. Ons ontdek opnuut wie Jesus is, en ons geloof begin weer groei.
Dawid het hierdie geheim verstaan toe hy gebid het dat hy tog net so graag in die Here se teenwoordigheid wil wees (Psalm 27:4). Hy het geweet dat 'n lewe van oorwinning nie uit honderd verskillende antwoorde kom nie, maar uit een fokus. Wanneer Jesus weer die middelpunt van ons aandag word, begin alles anders in perspektief kom.
Vra jouself vandag: Waarop rus my oë? Is dit op my uitdagings, of op die Een wat reeds die oorwinning behaal het? Geloof word nie gevoed deur bekommernis nie, maar deur 'n duidelike visie van Christus.
LEES: 2 Korintiërs 3:18
MEDITEER: Watter dinge het my aandag die afgelope tyd van Jesus af weggeneem? Hoe kan ek vandag my fokus doelbewus terugbring na Hom?
BID: Here Jesus, ek bely dat my oë dikwels vasgevang raak deur my omstandighede. Vandag kies ek om my fokus terug te bring na U. Herstel my visie sodat ek U weer helder kan sien. Dankie dat U die Begin en Voleinder van my geloof is. Laat my lewe weer floreer soos ek in U teenwoordigheid bly. Amen.
BONUS: SPREEK LEWE!
Ek hou my oë gevestig op Jesus. My visie word herstel, my geloof floreer, en Christus alleen is my fokus.
AANBIDDING:
If I got Jesus – Ben Fuller
Dag 5: Eindbestemming: Sion
Dis tog so lekker om te reis en nuwe plekke te ontdek. Dalk onthou jy die opwinding as kind wanneer julle iewers heen gaan. Hierdie skrywer onthou langpad, die radio wat nie opvang in die Karoo nie, daarom speel julle kaart, padkos, koue frikkadelle en sagte kaasbroodjies. Die reis, die oppad wees na ‘n bestemming is ook altyd lekker.
‘n Geloofslewe naby aan Jesus is 'n pelgrimstog met 'n bestemming. Die Bybel noem daardie bestemming Sion—die plek waar God Homself openbaar, waar sy teenwoordigheid ervaar word en waar sy kinders Hom sien soos Hy werklik is. Vir die Nuwe-Testamentiese gelowige is Sion nie bloot 'n plek waarna ons eendag gaan nie; dit is 'n geestelike werklikheid waarin ons reeds deur Christus leef. Elke tree van ons geloofsreis bring ons nader aan 'n helderder openbaring van God se heerlikheid. Die reis is lekker, want God stap saam met ons.
Psalm 84 beskryf mense wie se harte op hierdie pelgrimstog gerig is. Hulle beweeg "van krag tot krag" totdat elkeen voor God in Sion verskyn. Hoe nader hulle aan God leef, hoe duideliker sien hulle Hom. En hoe helderder hulle Hom sien, hoe sterker word hulle geloof.
Wanneer ons Jesus sien as die volmaakte openbaring van die Vader—vol genade, waarheid en liefde—begin ons lewe natuurlik verander. Ware transformasie begin nie by beter gedrag nie, maar by 'n helderder visie van Christus.
Die Heilige Gees neem hierdie waarheid nog verder. God gee nie net vir ons beginsels om te volg nie; Hy gee sy Gees om daardie waarheid in ons lewend te maak. Daarom kan God in een oomblik meer deur sy Gees doen as wat ons in jare deur eie inspanning sou kon bereik. Die Gees werk reeds binne die "mosterdsaadjie" van ons geloof en laat dit groei tot iets wat ons eie vermoëns oortref.
Hierdie waarheid kan in drie eenvoudige beginsels saamgevat word:
• Geloof gee uitvoering aan wat dit besef.
Wanneer God Homself aan ons openbaar, kan ons nie onveranderd bly nie. Geloof word sigbaar wanneer ons begin leef volgens dit wat ons van Christus ontdek het.
• Geloof ontdek deur aanbidding.
Aanbidding is die habitat waar ons oë vir Jesus oopgaan. In sy teenwoordigheid verander ons perspektief, ons geloof word versterk en ons harte word ontvanklik vir sy waarheid.
• Geloof leef binne God se geopenbaarde wil.
Geloof floreer wanneer dit geanker is in dit wat God reeds deur sy Woord en deur Christus geopenbaar het. Hoe beter ons Hom ken, hoe natuurliker leef ons volgens sy wil.
Dit is die pelgrimstog na Sion. Om God al hoe helderder te aanskou en om daardie geloof daagliks uit te leef sodat Sy heerlikheid in elke aspek van ons lewe sigbaar word.
LEES: Psalm 84
MEDITEER: Watter waarheid oor God wil die Heilige Gees vandag dieper in my hart vestig? Leef ek reeds uit dit wat ek van Christus ontdek het?
BID: Vader, dankie dat U my na Sion roep—na 'n lewe waarin ek U al hoe helderder aanskou. Vernuwe my denke deur U Woord en werk deur U Gees in my lewe. Help my om U beter te leer ken, om U met my hele hart te aanbid en om elke waarheid wat U aan my openbaar, met geloof uit te leef. In die naam van Jesus, Amen.
BONUS: SPREEK LEWE!
Ek is op pad na Sion. Ek aanskou Christus met 'n oop hart. My geloof ontdek deur aanbidding, gee uitvoering aan wat dit besef en floreer binne God se geopenbaarde wil.
AANBIDDING:
Be Enthroned – Jeremy Riddle