Verteenwoordigers van die Vader
Neville Goodchild
Dag 1 Kom ons (aan)bid
Hierdie skrywer sit vanoggend in Lewende Woord Bloemfontein Kerk saam met sy gesin. Hy adem (asem) die atmosfeer in en ʼn diepe vrede kom sit in sy hart. Tuiste. Soos wanneer jy van ʼn sporttoer af kom en jy ruik die vars gebakte beskuit uit jou ma se kombuis, die bekende klanke vul jou ore, jou huis ruik soos karringmelkbeskuit en jou hart en hongerte praat met mekaar. Hier gaan die reuk waarskynlik varsgemaakte koffie wees, mense loop met stomende bekers na binne om solank te sit. Ons het beslis die beste koffie in die stad. Oraloor staan groepe mense en gesels. Oud en jonk. Sommige dra al kortmouklere vir die somer wat kom, ander is nog steeds toegewikkel in die knus van winterklere.
Drie minute voor nege uur die oggend. ʼn Teller verskyn op die skerm om almal te laat verstaan om hul plekke in te neem terwyl die kenmerkende deuntjie wat al die geselsers roep begin speel. Twee minute. Een. Agtien sekondes. Tien. Nege ...
“Goeiemôre, Lewende Woord familie,” sê ons musiekleier, “ kom ons staan op en aanbid saam.” Aanbidding is nie net om te bid in jou slaapkamer nie. Dit is ook nie waar jy bid vir jou eie behoeftes nie. Natuurlik mag jy, maar daar is meer vleis aan die been as die SELF. Aanbidding gaan natuurlik oor lofprysing, maar dit gaan ook oor ons omgee vir die mense in ons alledaagse lewe. Ons is so geneig om net oor onsself te bid. En vinnig ook, want ons is besig. Ons spandeer nie tyd om vir mekaar te bid nie.
Vanoggend, voor die lering, kom ons in klein groepe bymekaar om vir mekaar te bid. Om Jesus se naam in elke probleem en aspek van lewens in te roep. “I speak Jesus.”
Die gemeente bid saam vir Alex en Linda wat geroep is om die werk van die Here te gaan doen Fauresmith. Die platteland is honger vir geestelike leiding, vir Jesus. Hulle het ʼn plan, hulle is reg daarvoor en ons bid vir hulle sukses.
Dit is nodig dat ons vir mekaar bid. Vir sommige van ons is dit moeilik omdat ons uit omgewings kom waar ons nie konfronteer word om direk vir iemand te bid nie, wat nog te sê om iemand op te dra aan God (hande op lê, wat uit die Nuwe Testament kom, lees vandag se leesstuk). Kom ons vra die Here om ons te bekragtig (empower) met die gewilligheid, die geloof, die dapperheid en die wete dat ons Jesus se naam in elke omstandigheid kan roep om verandering met krag te vestig. In Handelinge 4 is ʼn goeie voorbeeld vir die moderne Christen wat nie meer onder die Wet handel nie, maar ʼn verhouding met God het het deur Jesus se opoffering.
Wanneer jy praat, praat “Jesus”.
Lees
Mediteer
In watter aspek van my lewe kan ek meer “Jesus” praat op ʼn manier wat mense afsit nie, maar hulle nuuskierig maak om Hom te ontmoet?
Gebed
Vader God, dankie dat U Uself met ons bemoei. Ons wil U stem die heeltyd hoor, ons wil U energie en liefde tap deur aanbidding sodat ons die wat U nog moet ontmoet kan inspireer om te begin vra na U. In Jesus se naam, Amen.
Spreek Lewe
Ek is gered, daarom kan ek die naam van Jesus in moeilike omstandighede aanroep in aanbidding, ek kan staat maak op die Heilige Gees om my te lei en ek het toegang tot die Vader om ʼn verhouding te bou wat nie sal wankel nie.
Aanbidding
I speak Jesus – Josh Baldwin
Dag 2 ʼn Lewe wat Evangeliseer
Die sterkste metafoor wat die verhouding tussen God en mensdom in die Bybel beskryf is die huwelik. Vandag se leesstuk is een van die voorbeelde. Die Vyand wil natuurlik ons verhouding met die Here verwoes en een van die maniere is om die huwelik tussen man en vrou aan te val, want hy weet dat hy indirek ook die verhouding met die Here wil breek. Hoeveel gebrokenheid is daar nie in die wêreld oor stukkende huwelike nie.
In Petrus 3:1 staan daar:”Net so moet julle, vroue, aan jul eie mans onderdanig wees, sodat, as sommige aan die woord ongehoorsaam is, hulle ook deur die wandel van die vroue sonder woorde gewin kan word as hulle jul reine, godvresende wandel aanskou het.” Hierdie teks beteken glad nie dat vroue slawe moet wees nie. Inteendeel, mans en vroue is gelyk in God se oë. Hierdie gaan oor ʼn bereidwilligheid om te evangeliseer deur blote optrede.
Mans moet nie eers amper dink dat hulle vrygestel van bostaande optrede nie. In vers 7 staan daar dat mans en vroue mede-erfgename van die genade van die lewe is.
1 Petrus 3:7 “Net so moet julle, manne, verstandig met hulle saamlewe en aan die vroulike geslag, as die swakkere, eer bewys, omdat julle ook mede-erfgename van die genade van die lewe is — sodat julle gebede nie verhinder mag word nie.”
Wat Petrus hierbo sê is dat mense wat nie gehoorsaam aan die Woord is nie, slegs na ʼn man en vrou se voorbeeld moet kan kyk en daardeur gewin kan word vir die Koninkryk. Huwelike profeteer dus as’t ware van die getrouheid van Jesus wat vir seker sal terugkeer na Sy bruid (ons). Dit skep ook die bewustheid dat ek na my wedergeboorte nooit alleen sal staan nie, al is ek dalk enkellopend. God is getrou, verdraagsaam, geduldig en uiters lief vir ons. Ons optrede, of ons nou getroud is of nie, het die potensiaal om só te profeteer dat ander mense die Koninkryk as gevolg daarvan opsoek. Ons praat Jesus ...
Lees
Mediteer
Is my lewe en my huwelik ʼn profesie of ʼn protes?
Gebed
Vader God, dankie dat U vir ons die geleenthede gee om U vennote te wees in U missie om mense te red. Help ons om meer en meer bereidwillig te wees om met volwassenheid op te tree in moeilike situasies en dat ons verhoudings met ander mense en in ons huwelike sal spreek van U liefde. In die naam van Jesus, Amen.
Spreek Lewe
Ek is wedergebore, daarom sal ek nooit weer alleen staan in enige situasie nie.
Aanbidding
Jesus Loves – Zach Williams
Dag 3 Verhoudings wat krap
Die meeste van ons is iewers, soms noodgedwonge soos in ʼn werksituasie, in ʼn verhouding wat ons irriteer, krap en selfs seermaak. Soms is mense bloot geneig om lelik met ons te wees en ons wil terugkap met dieselfde gedrag. Maar dit is nie wat God wil hê wedergeborenes moet doen nie.
In 2 Pet. 18-25 (The Message) word werknemers versoek om bereidwillig te wees om die hele missie van Jesus op aarde verder te vat. Hierdie missie is evangelisasie. Ons word vennote van die Here wanneer ons eerder terugstaan as terug slaan.
Ons weet tóg uit eie ervaring dat mense wat ander verneder of seermaak of die heeltyd skel ons nie gaan oorwen om in hulle span te speel nie. Wie volg sulke mense? Maar wanneer ons goed doen waarvoor ons nie beloon word nie, wanneer ons leed en seer verdra ter wille van die Span van God, die missie wat evangelisasie is, dan is ons stilte ʼn getuienis vir die sondaar wat dit sien. Ons optrede spieëlbeeld God se genade.
Bostaande beginsel word ook mooi in 2 Kor. 5:21 (TLB) illustreer. Jesus het die las gevat sonder om te kla. Hy is selfs geslaan, gespot, verneder. Hoekom het Hy stil gebly? Hy het geweet wat die missie is, daar was “purpose” in sy pyn.
Nou moet ons dieselfde doen. As ons ly of bereidwillig is om leed te verdra vir ʼn doel word ons vennote van Jesus. Dit is ʼn groot geleentheid wat ons moet aangryp! Dit is genade. God sal red as jy pyn, frustrasie, irritasie, mense wat jou reputasie afbreek, konflik ensovoorts, verdra met ʼn bereidwilligheid wat ander nie sal verstaan nie, maar hulle anders sal laat kyk na die Vader.
Geestelike volwassenes is mense wat daardie mense in ons lewe wat spesiaal genoeg is om ons af te sit, eerder te verdra omdat ons weet wat die missie is.
Lees
Mediteer
Wie is die mens naby aan my wat my die meeste krap? Wat is my eerste taak nou dat ek weet van my missie?
Gebed
Vader God, mense kan ons maar seermaak. Ons bring dit na U toe, tot U eer, in die hoop dat hulle U sal sien. Gee ons die krag om te verdra. Ons wil vennote in die genadewerk van Christus wees. In die naam van Jesus, Amen.
Spreek Lewe
Daar is “purpose” in my pyn.
Aanbidding
Whatever your plan is – Josie Buchanan
Dag 4 Gehoorsaamheid in 'n Onregverdige Wêreld
1 Petrus 2:18-25 (vandag se leesstuk) is 'n uitdaging vir elke gelowige, veral in 'n wêreld waar regverdigheid en gelykheid hoog aangeslaan word. Moet nie eers praat van die “woke” beweging wat net op die self en eie belang gefokus is nie en mense wat daarteen is probeer verpletter.
Wat Petrus hier sê is: "Wees onderdanig aan julle hoofde met alle verskuldigde eerbied, nie net teenoor die goeies en vriendelikes nie, maar ook teenoor die onredelikes." Dit klink dalk onregverdig of selfs onbillik, maar die punt is nie om onreg te verdedig nie. Die punt is om God se eer te soek in elke omstandigheid.
Petrus herinner ons dat ons nie hierdie onreg verduur om mense te behaag nie, maar om God te behaag. Dit is om Christus ontwil dat ons ly. Deur onreg te verduur sonder om terug te baklei, volg ons die voorbeeld van Jesus self. Hy het onregverdig gely, is geskel en gespot, maar het nooit teruggeskel nie. Hy het Homself toevertrou aan God, die regverdige Regter.
Hierdie opdrag is 'n kragtige vorm van evangelisasie. Hoe ons reageer wanneer ons onregverdig behandel word, spreek harder as enige preek. Wanneer mense sien dat ons nie reageer soos die wêreld nie—met woede, bitterheid of wraak—sal hulle vra hoekom. Dit is ons geleentheid om te verduidelik dat ons ons hoop en krag uit God put. Ons getuienis is nie net in wat ons sê nie, maar in hoe ons leef, selfs in die moeilikste omstandighede. Ons lewens word 'n spreekbuis vir die Evangelie.
Lees
1 Petrus 2:18-25 (The Voice)
Mediteer
Petrus skryf hier aan gelowiges wat vervolg word, verneder word. Hoekom gee hy hulle hierdie opdrag om onderdanig of bereidwillig te wees?
Gebed
Liewe Here, dankie vir die voorbeeld van Jesus, wat onregverdig gely het, maar nie teruggestry het nie. Help my asseblief om ook so te wees. Vergewe my waar ek so dikwels in woede of bitterheid reageer wanneer ek onregverdig behandel word. Help my asseblief om my lewe so te leef dat dit 'n getuienis is van U genade. Mag my optrede in moeilike situasies mense na U toe trek. Amen.
Spreek Lewe
My fokus is op God se genade, nie mense se aksies nie.
Aanbidding
Hold me through the fire – Teddie Swims
Dag 5 Die Liefde in die Huwelik as 'n Uitnodiging na God se Koninkryk
Petrus 3 is vandag se leesstuk. In hierdie gedeelte skilder Petrus 'n pragtige prentjie van hoe 'n huwelik 'n kragtige evangelisasie-instrument kan wees. Hy begin deur die vrou aan te spreek en haar aan te moedig om haar man te wen "deur haar lewenswandel, selfs al sou hy ongehoorsaam wees aan die woord." Dit is nie 'n oproep tot stilte of onderdrukking nie, maar 'n uitnodiging om deur die krag van haar karakter te getuig. Haar ware skoonheid is nie die uiterlike nie, maar die "innerlike mens, met die onverganklike versiering van 'n sagte en stille gees."
Petrus wend hom dan tot die mans en sê hulle moet hul vrouens "met insig" behandel en as "mede-erfgename van die genade van die lewe" ag. Dit beteken dat 'n man sy vrou nie as 'n minderwaardige moet sien nie, maar as 'n gelyke vennoot in God se Koninkryk. Die liefde en respek wat hy aan haar bewys, is so belangrik dat dit sy gebedslewe kan belemmer as hy dit nie doen nie.
'n Gesonde, Bybels-gefundeerde huwelik is 'n lewende preek. Dit wys aan die wêreld wat God se plan vir verhoudings is. Wanneer nie-gelowiges 'n huwelik sien waar liefde, respek en opoffering die fondasie is, is dit 'n aantreklike prentjie van God se liefde en genade. Dit is 'n lig in 'n donker wêreld wat wys dat God ware en blywende verhoudings kan skep. Jou huwelik is meer as net 'n verhouding; dit is 'n sendingveld wat die wêreld kan wys wat God se liefde is.
Petrus sluit af deur te sê dat dit beter is om te ly omdat jy goed doen, as om te ly omdat jy kwaad doen. Hy herinner ons aan Jesus wat vir ons gely het, die regverdige vir die onregverdiges, om ons na God te bring. Die groter prentjie is dus dat ons as vreemdelinge in hierdie wêreld geroep is om God se genade te verklaar deur ons lewens, of dit nou in ons persoonlike verhoudings of in ons lyding is.
Lees
1 Petrus 3 (The Voice)
Mediteer
Kan ek regtig deur my optrede iemand se lewe verander?
Gebed
Liewe Here, dankie vir die geskenk van huwelike en verhoudings. Help my asseblief om in my huwelik 'n weerspieëling van U liefde te wees. Help my om my maat te eer en lief te hê, soos U die kerk liefhet. Mag my lewenswandel 'n getuienis wees wat ander na U toe trek. Maak my hart sag en sagmoedig, en vul my met U genade sodat my verhoudings U kan verheerlik. Amen.
Spreek Lewe
Deur genade is ek sagmoedig en geduldig.
Aanbidding
Less like me – Zach Williams