VIND, VOLG EN VERVUL GOD SE WIL
De Villiers Nel
Ken God se wil deur Sy Woord
Dag 1: Vrede
“Vrede laat ek vir julle na, my vrede gee Ek aan julle, nie soos die wêreld gee, gee ek aan julle nie. Laat julle hart nie ontsteld word en bang wees nie.” (Joh. 14:27)
Vandag is dit die derde preek in die reeks wat handel oor “Vind, Volg en Vervul die wil van God.” Ons het gehoor dat:
- God wel Sy wil bekend maak aan alle mense, nie net aan sekere mense nie. God is nie ‘n aannemer van persoon nie. Hy trek dus nie sekere mense voor nie.
- Daar is drie maniere waarop ons God se wil kan vind, volg en vervul (Kol. 3:15-17):
* God se vrede navolg
* God se Woord
* Aanbidding
- God se vrede werk tweeledig. Ons het die Heilige Gees ontvang wat ons lei en God se Woord aan ons openbaar. Ons moet in God se vrede bly, deur Jesus se voorbeeld te volg, deur net te doen en te sê wat ons van God ontvang, om te doen en te sê.
- Vrede is die habitat van God se wil: vrede skep die konteks en innerlike realiteit waarin God sy wil met my kan deel.
- Vrede is as ter ware die skeidsregter in jou hart wat jou lei om die regte besluite te neem. God se vrede moet die hoogste gesag in ons lewens wees en die deurslaggewende faktor in ons besluitneming.
- Ons vind God se vrede wanneer ons in verhouding met God leef. Die Heilige Gees maak God se wil aan ons bekend en ons beleef openbaring kennis – Rhema Woord. In verhouding lei God se liefde ons op die regte pad.
- Ons kan onderskei tussen die vals vrede van die wêreld en God se vrede deur dit te toets aan die Woord van God.
Dit bring ons by die onderwerp van vandag se preek. Verlede week het ons gesien dat ons die wil van God kan volg, vind en vervul deur die vrede van God te beleef en die week kyk ons hoe om die wil van God te ontdek deur die Woord van God.
LEES:
Mediteer:
- Watter rol speel die vrede van God en goddelike begunsels in jou besluitnemingsproses?
- Soek jy God se wil en Sy vrede voor jy besluit wat om te doen?
- Gee die dinge wat vandag jou vrede steel vir die Here en vra die Heilige Gees om jou te help om jou innerlike vrede te herstel.
Bid:
Abba Vader, Jesus Christus en Heilige Gees, ek raak nou stil en vra dat U vir my wys waar ek besig is om my eie kop te volg en waar ek nie U vrede eerste in my lewe soek nie. Openbaar aan my die dinge wat my vrede steel. Help my om U vrede met my hele hart te soek elke dag in elke situasie. Amen.
BONUS: SPREEK LEWE!
God gee aan ons Sy vrede wat alle verstand te bowe gaan.
Aanbidding:
U Vrede Bewaar My | Filipense 4 7 | Lofprysingslied
Dag 2: God se Woord bevestig God se wil
Die waarheid in die wêreld staan in baie gevalle lynreg teenoor die waarheid volgens God se Woord. Sosiale media(Facebook, Tiktok, Instagram, e.g.) en die algemene wêreld siening ten opsigte van etiese gedrag en Christelike lewenswandel, vervaag die lyne waarbinne ons veilig kan beweeg. Dit hou nie van die nougesette Christelike riglyne wat ons in die Woord kry nie en daag elke waardesisteem en geloofstruktuur uit. Ons sien dat baie kerke en Christelike bewegings aanpassings maak en kompromieë aangaan. Hulle begin redeneer en glo al hoe meer soos die wêreld. Onder andere is daar die oortuiging dat indien ek genoeg “doen” vir die kerk en vir die Here, dat dit net met my sal goedgaan. In hierdie geloofstelsel is ek die middelpunt van my bestaan. Alles wat ek vir die kerk doen gaan eindlik ook oor my en oor hoe oulik ek is. Omdat ek so oulik is sal die Here dat dit altyd goed gaan met my en my familie en sal my lewe al hoe gemakliker word.
Dit is nie die waarheid nie. Dit staan nie in die Woord nie. Dit is in teenstelling met die Woord, wat sê dat God die fokus in ons lewe moet wees en dat ons so moet leef dat ons lewe eer en heerlikheid aan God bring.
As ons dus die wil van God soek, kan ons dit altyd toets aan die Woord. God sal nie iets aan ons openbaar as Sy wil as dit in teenstelling met die Woord is nie.
Lees:
Mediteer:
- ‘n Ernstige vraag om die oor na te dink is; “Wie is die middelpunt van my geloof?”
- Nog ‘n vraag; “Wat wil ek hê uit my ‘godsdiens’?”
- Vader se wil strek verby my en my koninkryk.
- Vader se Woord gee duidelike riglyne oor Sy wil.
Bid:
Vader U woord is duidelik en gee ons so baie om mee te werk, dankie vir u riglyne oor wat U wil is. Vader help my om U Woord ernstig te bestudeer en om U wil daarin te vind, te verstaan en te volg. Amen.
Bonus: Spreek Lewe!
Dit is binne my bereik om Vader se wil te ken.
Aanbidding:
Revelation Song | Acoustic Worship Song | Stephen McWhirter
Dag 3: Heiligmaking is God se wil
'3Want dit is die wil van God: julle heiligmaking; dat julle jul moet onthou van die hoerery; 4dat elkeen van julle moet weet om sy eie vrou te verkry in heiligheid en eer, 5nie in hartstogtelike begeerlikheid soos die heidene wat God nie ken nie; 6dat niemand sy broeder in hierdie saak moet bedrieg en benadeel nie, omdat die Here 'n wreker is oor al hierdie dinge, soos ons aan julle ook vantevore gesê en betuig het. 7Want God het ons nie tot onreinheid geroep nie, maar tot heiligmaking. 8Daarom, hy wat dit verwerp, verwerp nie 'n mens nie, maar God wat ook sy Heilige Gees aan ons gegee het. ' (1Tess. 4:3-8, Afr. 53 Vert.)
Ons is dadelik regverdig voor God, skoongewas van sonde deur die bloed van Jesus Christus, wanneer ons tot bekering kom. Na bekering begin die proses van heiligmaking. Met bekering ontvang ons die Heilige Gees van God wat ons help in die proses van heiligmaking. Heiligmaking vind plaas in verhouding met God in samewerking met die Heilige Gees. Die gevolg en uitwerking van heiligmaking is dat my lewe meer en meer soos die van Christus lyk.
Die lewe wat die wêreld proklameer is op die eie ek gerig. Alles gaan oor dit wat vir die mens lekker is en wat plesier verskaf vir die mens. Dit gaan oor die eie ek wat die reg het om oor myself en oor my tyd en my geld te besluit. Die eie ek besluit ook om mense uit te sny wat nie inpas in die lewe wat ek vir myself beplan en sien nie. Dit is die teenoorgestelde van wat God se wil is. God se wil vir ons is heiligmaking. Ons is geneig om in die vlees te leef en daarom is die werking van die Heilige Gees van uiterste belang om ons te help om God se wil te vind, volg en vervul in heiligmaking.
Seksuele sonde en God se wil kan nie vermeng word nie. Die mens se vlees wil in sommige situasies hierdie tipe sonde vertroetel en wegsteek. Die mens word soms verstrengel in hierdie sonde en dit veroorsaak skuld en skaamte. Dit steel die mens se vrede en issoleer die mens.
Gelukkig is daar genade en kan hierdie sonde in die proses van heiligmaking hanteer word en kan mens verlos word daarvan. Die mens kan dan waarlik vry wees en groei in sy verhouding met God.
Lees:
Mediteer
- Kan jy getuig van verandering na wedergeboorte of anders gestel van heiligmaking?
- Kon jy al sekere dinge aflê waarmee jy gesukkel het?
- Indien jy vasgevang is in iets soos seksuele sondes waarvan jy nie kan loskom nie wil ek jou aanmoedig om kontak te maak met die leiers by Lewende Woord Bloemfontein by 0608354778.
Bid:
Vader help my om te groei in my Christenskap. Help my om dinge te hanteer wat nie in lyn is met U Woord en standaarde nie. Gee my die genade om meer en meer heilig te word. Amen.
Bonus: Spreek Lewe!
Die wat deur God vrygemaak word is waarlik vry!
Aanbidding:
Ashes & Steel – Chris Stapleton ft Jelly Roll
Dag 4: Broederliefde
'12And may the Lord make your love for one another and for all people grow and overflow, just as our love for you overflows. 13May he, as a result, make your hearts strong, blameless, and holy as you stand before God our Father when our Lord Jesus comes again with all his holy people. Amen.' 1 Thessalonians 3:12-13 (Eng. Amp.)
God is liefde en hoe meer ons word soos Christus deur heiligmaking, hoe meer word ons God se liefde. Liefde sal altyd die rigting wees waarin ware kinders van God groei en beweeg. Liefde vir mekaar versterk ons en help ons om in geloof te groei. Dit help ons om onberisptelik te leef en te streef na heiligheid. Die woord van God sal ons altyd lei na liefde en heiligheid. Daar is geen heiligmaking buite liefde nie. God se woord moedig ons aan om in liefde en vrede met almal te leef. Hoe meer ons God se liefde uitleef, hoe meer sal ons groei in heiligmaking en hoe meer sal ons soos Christus lyk. God het ons spesiaal so geskape dat ons vir mekaar lief kan hê, sodat ons in verhouding met mekaar sal groei in liefde. Liefde soos beskryf in 1 Kor. 13 gee ‘n prentjie van hoe liefde van God lyk en wat dit is.
Waar ek God se wil volg, vind en vervul, sal die evangelie verkondig word deur die liefde van God wat uitgeleef word. Mense word aangeraak en verander deur die liefde van God.
Lees:
Mediteer:
- Ervaar jy dat God liefde aan ander mense bewys deur jou, deur wat jy doen en hoe jy ander mense lief het?
- Wees intensioeneel daarin om te groei in liefde vir alle mense en om toe te laat dat God liefde vir alle mense deur jou lewe kry.
Bid:
Abba Vader, Jesus Christus en Heilige Gees dankie vir U kosbare liefde en vir die voorbeeld van volmaakte liefde wat die moeite werd is om na te volg. Help my Here om te bid, vas en te gee met alles in my. Bewaar ons geliefdes van alle kwaad en lei my elke dag in U liefde Heer. Amen.
Bonus: Spreek Lewe
Liefde onbeskryflik groot het U aan my bewys.
Aanbidding:
Love Has a Name | Jesus Culture Studio Version ft. Kim Walker-Smith
Dag 5: Vind, volg en vervul God se wil deur stil te wees
Hierdie is vir my die moeilikste deel daarvan om God se wil te soek. Dit is ook volgens my die belangrikste deel. My hele wese kom in opstand teen die idee van stil word, maar om te hoor wat God sê is dit van uiterste belang dat ek stil word. Die boodskap van vandag gaan verder as dit. Heiligmaking vra nie net dat ek vir ‘n oomblik stil word en hoor wat God se wil is nie. Nee! Dit vra ‘n dat ek ‘n lewenswandel kweek van rustigheid, van stil wees en luister na God se Woord, God se stem.
1 Tes 4:11 (Afr. 53 Vert.)
11 en julle eer daarin te stel om rustig te lewe en julle eie sake te behartig en met julle eie hande te werk, soos ons julle beveel het.
In ander vertalings klink dit so:
“Laat dit jou ambisie wees om in rustigheid te leef. Maak dit jou mikpunt om stilte te bewaar in jou lewe.”
“11 And to aspire to live quietly, and to mind your own affairs, and to work with your hands, as we instructed you.” 1 Thes. 4:11(Eng.)
In die drafstap van die lewe, hardloop ons ongesiens weg van ‘n baie belangrike deel van heelword. ‘n Dokter moet ons ondersoek om te probeer uitvind wat is fout met ons, voordat hy ‘n voorskrif kan gee vir medikasie om genesing te bring. Net so moet ons stil word en toelaat dat God deur die Heilige Gees ons ondersoek en dan kan ons heel word. ‘n Ander woord vir heiligmaking is ‘heel’. Ons moet in ‘n gewoonte kom om stil tevrede te lewe en te wandel in God se teenwoordigheid, dan sal ons heel wees en vir ander kan help om heel te word.
“The thing I mean can be seen, for instance, in children, when they find some game or joke that they specially enjoy. A child kicks his legs rhythmically through excess, not absence, of life.
Because children have abounding vitality, because they are in spirit fierce and free, therefore they want things repeated and unchanged. They always say, “Do it again”; and the grown-up person does it again until he is nearly dead. For grown-up people are not strong enough to exult in monotony.
But perhaps God is strong enough to exult in monotony. It is possible that God says every morning, “Do it again” to the sun; and every evening, “Do it again” to the moon.
It may not be automatic necessity that makes all daisies alike; it may be that God makes every daisy separately, but has never got tired of making them.
It may be that He has the eternal appetite of infancy; for we have sinned and grown old, and our Father is younger than we.”
G.K Chesterton
Vir ons is dit moeilik om te fokus op die allerdaagse, gewone dinge. Ons moet besef hoe belangrik dit is om teenwoordig te wees met ons wese in alles wat ons elke dag doen. Dit is die allerdaagse, gewone dinge wat ons dag vul. Ons moet leer om aandag te gee, want alles is deel van aanbidding. In alles kan ons oorvloedig lewe.
“Aan julle is vertel dat die lewe ’n duisternis is, en in julle vermoeidheid herhaal julle die woorde van die vermoeides.
En ek sê dat die lewe inderdaad duisternis is, tensy daar ’n drang is. En alle drange is blind, tensy daar kennis is.
En alle kennis is nutteloos, tensy daar werk is.
En alle werk is betekenisloos, tensy daar liefde is.
En wanneer julle met liefde werk, bind julle julself aan julself, en aan mekaar, en aan God.
En wat beteken dit om met liefde te arbei?
Dit is om ’n kleed te weef met drade wat uit die hart getrek is, net asof jou beminde daardie kleed sal dra.
Dit is om ’n huis met toegeneëntheid te bou, net asof jou beminde in daardie huis sal woon.
Dit is om die saad met teerheid te saai en die oes met blydskap te maai, net asof jou beminde die vrug sal eet.
Dit is om die asem van jou siel te blaas in alle dinge wat jy vervaardig …
Werk is liefde sigbaar gemaak.”
Kahlil Gibran
Dawid sê in Psalm 63:2 dat hy verlang en smag na God; dors na die Here soos ‘n uitgedroogde land. Dit is hoe ons na God se wil moet soek. Prioritiseer om stil te word en God se wil te vind, volg en te vervul.
Lees:
Mediteer:
- Daag jouself uit om stil te word by God. Spieël jouself in die Woord van God en laat toe dat die Heilige Gees jou help om heel te word.
- Prioritiseer hierdie oefening in heiligmaking in jou lewe en maak dit ‘n leefstyl.
Bid:
Dankie Vader dat ons U wil kan vind, volg en vervul. Help ons om rustig te lewe en stil te word in U teenwoordigheid. Ons wil graag binne U wil en bepalings vir ons, lewe. Help ons Here elke dag om hierin te groei. Die gees is gewillig, maar die vlees is swak. Here help ons in ons swakheid. As verskonings by ons opkom, gee ons die krag om die wêreld eenkant toe te skuif en U te soek soos Dawid, met ‘n dors soos ‘n uitgedroogte land. Amen.
Bonus: Spreek Lewe!
Laat U wil geskied in die hemel; net so ook op die aarde.
Aanbidding:
Meer en meer soos Jesus – Kansel NG Oos
Doen slegs U wil Heer – Dawie Nolte – Kansel NG Oos