Mindsets
Neville Goodchild
Hoe om negatiewe denke te hanteer
Dag 1: Jy dink dit is jou omstandighede
God het ons as mense gemaak om baie dinge te oorleef, te midde van moeilike omstandighede. Baie van ons se lewensituasies is relatief stabiel, met geen direkte bedreiging wat ons nou dadelik van ons toekoms wil ontneem nie. Tog beleef ons negatiewe denke oor ons omstandighede.
Ons weet dat lewensomstandighede nie die grootste rol in lewensgehalte speel nie, omdat daar oor en oor bewys word dat mense in uiters slegte omstandighede steeds vervulling kan beleef.
Waaroor is die negatiwiteit dan?
Die vyand het planne om ons met negatiwiteit oor alles besig te hou en om ons op ’n plek te bring waar ons nie ons gedagtes kan hanteer nie. Sy strategie is ook nie net gedagtes om ons denkspasies mee te vul nie, maar om hierdie gedagtes as patrone so te vestig dat dit skanse word teen die kennis van God.
God het ons bemagtig om elke gedagte gevange te neem en te belyn met God se ware Woord. Elke gedagte moet sy knie buig voor die wil en waarheid van God.
Lees:
Mediteer:
- Met watter negatiewe gedagtes hou die vyand jou besig?
- Watter negatiewe planne is tans as skanse opgerig wat jou weerhou om die ware kennis van God voorop te stel?
Bid:
Here, kom maak aan my bekend watter negatiewe gedagtes en skanse opgerig is in my denke wat veroorsaak dat daar ’n muur tussen my en U is. Help my asseblief en kom breek hierdie skanse af met U waarheid. In Jesus se Naam. Amen
Bonus: Spreek Lewe!
Die lewe wat ons leef is ’n gevolg of effek van dit wat ons dink.
Aanbidding:
Call Upon the Lord – Elevation Worship
Dag 2: Skanse
Wanneer ons denke negatief beïnvloed word, ontstaan daar ’n negatiewe filter wat op elke belewenis toegepas word. Dit word ’n gevestigde gedagtepatroon. Dit vorm ’n skansmuur tussen jou en God, tussen jou en die kennis van God. Wanneer daar ’n skansmuur tussen jou en God is, is jy nie meer bewus van wie God is nie. Jy het so begin rondkyk en leer uit jou omstandighede, dat jy verleer het, of nie geleer het, wie God is nie.
Dit het baie dinge tot gevolg. Jou denke word só beïnvloed deur jou omstandighede en die negatiewe filter waarmee jy leef, dat jy nie meer in God glo nie. Jy betwyfel sy goedheid en sy wil om in jou lewe betrokke te wees. Vanaf hierdie oomblik wat jy begin twyfel, hou jy op om geestelik te groei.
Dan word jy soos Jeremia in Jer.15:15-18. Twyfel in die Here bring jou op ’n plek waar jou seer nie kan genees nie en jy soos ’n stroom is wat nie standhoudend is nie. “Die Here het toe gesê, "As jy jou woorde terugneem, sal Ek jou weer in my diens neem. As dit wat jy sê waarde sal hê en nie onsin sal wees nie, sal jy weer namens My kan praat. Die mense moet jóú volg, nie jy vir hulle nie.” (Jer.15:19-21)
Wanneer jy op ’n plek kom waar jy jou denke belyn met die denke van Christus, word dit makliker om sonde en ongehoorsaamheid uit te skakel en jou wil te belyn met die wil van die Here. Dit word moontlik wanneer jy negatiewe denke hanteer.
Lees:
Mediteer:
- Het jy begin twyfel aan God se goedheid?
- Wat het jy om te verloor indien jy jou denke bekeer en belyn met God se goedheid?
Bid:
Here ek bely dat ek U in twyfel plaas en opgehou het om te glo in u goedheid. Dankie Jesus dat U vir my ’n pad gemaak het om versoen te word met God. U het met u voorbeeld Vader se hart vir ons kom openbaar. Ek belyn nou my gedagtes met U waarheid, dat U goed is en dat u gedagtes oor my goed is. Amen.
Bonus: Spreek Lewe!
Elke goeie gawe en elke volmaakte geskenk kom van Bo. Dit kom van die Vader wat die hemelligte geskep het, maar wat self nie soos hulle verander of verduister nie (Jak.1:17).
Aanbidding:
Dag 3: Gedagtefilters
Net soos ’n mens filters op foto’s kan plaas om die foto wat jy sien op ’n ander manier te sien (wit en swart), of die fokus te verskuif na ’n spesifieke gedeelte (in te zoom), so plaas jy in jou gedagtewêreld ook filters op die lewe. Sekere ervaringe maak dat jy met sekere filters na situasies kyk en vanuit hierdie posisie of filter reageer. So kan twee individue na presies dieselfde situasie kyk en wegstap met twee teenoorgestelde reaksies. Twee mense kan langs mekaar in die kerk sit, die een haat elke oomblik as gevolg van ’n ervaring dat Christene vals en arrogant is en ’n ander ervaar dat God besig is met ’n groot werk in sy/haar lewe. Afhangend van die dinge waarmee jy jou besig hou, die dinge wat jy lees, of nuus wat jy hoor, kan jy oortuig word dat daar geen toekoms vir die mensdom is sonder ’n inenting nie, of dat daar niks gevaarliker in hierdie tyd is as ’n inenting nie. Dit hang af van dit wat jy lees en na wie jy luister.
In Num.13-14 lees ons die verhaal waar Moses twaalf spioene uitgestuur het. Hulle het elkeen presies dieselfde gesien en dieselfde inligting bymekaargemaak, maar elkeen se filter het verskil. Daar was net twee uit die twaalf wat nie ’n negatiewe filter opgehad het nie.
“Ons was soos sprinkane in ons eie oë en so was ons ook in hulle oë.”
Dit is baie makliker om bang, negatief, krities en skepties te wees as om positief te wees!
“Ons moet beslis optrek en die land in besit neem, want ons kán dit doen.”
Jou filter bepaal jou siening en sukses oor elke situasie!
Lees:
Mediteer:
- Hoe lyk die filters waarmee jy rondloop?
- Watter gebeure in jou lewe het ’n invloed op jou uitkyk oor die lewe, oor mense en oor jou toekoms?
- Wat lees jy en na wie luister jy?
- Watter effek het die mense en media wat jy gebruik op jou uitkyk/filters?
Bid:
Here, help my om die negatiewe filters wat ek op het te identifiseer en af te haal. Ek wil U vertrou en u siening en uitkyk oor situasies hê. Help my om te sien soos U dinge sien, in Jesus se Naam. Amen
Bonus: Spreek Lewe!
Jou filter bepaal jou siening oor elke situasie! Dit bepaal jou emosionele besluite en jou aksies vloei daaruit!
Aanbidding:
Goodness of God – Bethel Music
Dag 4: Wat raam jy?
Dink aan jou lewe vandag. Watter deel van jou lewe raam jy? Hoe het jou lewe tot dusvêr uitgedraai? Bevind jy jou waar jy beplan het, of op ’n teenoorgestelde plek, onseker oor die toekoms? Het jy dalk spesifieke drome gehad, maar vandag lê hierdie drome in stukke? In Fil.1:12-14 lees ons dat Paulus die teenoorgestelde beleef as wat hy beplan het. Tog het hy die vermoë ontvang om realiteite en negatiewe denke te hanteer. Hy sê vir hulle, “Ek wil hê julle moet weet, broers, dat wat my oorgekom het, juis die verkondiging van die evangelie bevorder het.”
Die mense wat die briewe ontvang het, kon baie dinge gevrees het en baie twyfel beleef het. Hulle weet dat Paulus as gevangene aangehou is, gemartel is en honger gely het. Paulus vertel hulle dat hy die geleentheid kon gebruik om die evangelie van Jesus Christus met ander mense te deel: wagte het tot bekering gekom en selfs die keiser het die goeie boodskap gehoor. Dit is hoe Paulus negatiewe denke hanteer het. Paulus kies wat hy vir sy gehoor gaan raam. Hy gebruik nie net filters vir die verlede nie, maar hy kies ook die regte raamwerk vir die toekoms. Wanneer jy iets raam, raam jy dit vir ’n leeftyd!
Lees:
Mediteer:
- Hoe lyk jou storie?
- Watter rame gebruik jy vir jou lewensverhale?
Bid:
Here, dankie dat U my bewus maak van die verskillende rame en maniere van raam. Ek wil U persepsies en raamwerk gebruik om my storie te sien: wat die doel is wat U vir my in hierdie lewe stel en hoe ek dit kan bereik. Nie my eie strewe en situasie nie, maar dit wat U wil is. Dankie, dat U my help om die regte dele te kies en met U perspektief te raam. In Jesus se Naam. Amen
Bonus: Spreek Lewe!
Dit wat jy raam is vir ’n leeftyd. Make it count!
Aanbidding:
Dag 5: Reframe
Hier is drie hulpmiddels om jou te help om situasies en verhoudings oor te raam:
- Dank die Here vir wat nie gebeur het nie! Wat kon nie alles gebeur het nie? Waar sou ek dan gewees het?
- Beplan en kies jou raam vooraf! Besluit vooraf hoe jy ’n situasie gaan hanteer of wat jy daarmee gaan maak, voordat dit gebeur. Ons gedagtegang bepaal dikwels wat ons beleef. Ons besluit so dikwels dat ’n afspraak negatief of ’n mors van tyd gaan wees, of dat ’n gesprek in konflik gaan ontaard.
- Soek God se goedheid! Jy sal altyd vind waarna jy soek. As jy negatiwiteit soek, sal jy dit vind. As jy God se goedheid soek, sal jy dit vind.
His goodness is beyond our ability to comprehend, but not our ability to experience! Our hearts will take us where our heads can’t fit! - Bill Johnson
Hierdie dinge het gebeur, maar dit beteken nie noodwendig wat ek dink dit beteken nie. Ek kies wat ek toelaat en ek laat die Heilige Gees toe. Ek roep die Heilige Gees in om profeties te raak en ek kies en glo en soek vir ’n goeie uitkoms. Ek werk daaraan en neem met positiewe insette daaraan deel. Dit is my keuse of ek op Jesus staatmaak en Hom deel maak van elke situasie, elke gedagte.
Lees:
Mediteer:
- Waarvoor het jy nodig om die Here te dank?
- Watter situasie of gesprek lê voor waarvoor jy die Here kan vra om jou te help om dit met sy perspektief te omraam?
- Kan jy God se goedheid raaksien in enige area van jou lewe, verlede of tans?
- When what we believe is anchored in the reality of who He is, our world comes into agreement with Heaven where the reality of His world increasingly invades ours, manifested in both power and glory! - Bill Johnson.
- Cognitive reframing is empowering you to decide the meaning of an event. Nooi Jesus in en laat toe dat die Heilige Gees die betekenis vir jou uitlê en bepaal.
- Hoe kan jy saam met die Here deelneem en glo, en sodoende profeties raak oor uitkomste waarvoor jy die Here vertrou?
Bid:
Here, ek loof en prys u Naam, want U is Almagtig, Alomteenwoordig en Alwetend. Ek gee U nie genoeg krediet vir die goeie dinge in my lewe nie. Dankie, vir die volgende...(Noem dit waarvoor jy dankbaar is).
Here, U weet presies wat in hierdie (situasie/gesprek/krisis/verhouding) in my lewe aangaan. Here, ek nooi U, kom gee vir my u perspektief hieroor. (Word stil en gee geleentheid vir die Here om vir jou te wys).
Vader, U is ’n goeie God. Alles wat goed is kom van U af. Alles in my lewe. Dankie, vir u goedheid. U het net goeie gedagtes oor my en oor my toekoms. Dankie, daarvoor. Deel asseblief u waarhede met my.
Here, soos u Woord sê dat ek moet vra en dat ek moet dankie se asof ek alreeds ontvang het, bring ek nou die volgende voor U (...gee dit wat nodig is vir Hom) en ek loof U vir u insae en die veranderinge wat U bewerk. Dankie, vir u genesing, herstel, oorvloed en vooruitgang wat U bewerk in my situasie/verhouding/liggaam. Ek sal floreer en gedy in u goedheid. Ek loof en prys U Naam want U is die Groot EK IS. In Jesus se Naam. Amen.
Bonus: Spreek Lewe!
Interpret your circumstances through the goodness of God. Don’t interpret the goodness of God through your circumstances! – Craig Groeschel.
Aanbidding:
King of My Heart – Bethel Music